Read Pohnpeian Melkahka Kan 48 Bible Online

Melkahka Kan 48 - Pohnpeian bible

Melkahka Kan 48

¹KAUN-O me uhdahn lapalahpie oh warohng ale kaping nan kahnimw en atail Koht, pohn sapwellime dohl sarawi.

²Saion, sapwellimen Koht nahna me ile oh kaselel; kahnimw en nanmwarki lapalapo kin kaparanda sampah pokon.

³Koht ketin kasalehda me mie wasahn ruk reh nan kelen kahnimw wet.

⁴Nanmwarki kan ehupenehr oh kamwakidadahr mahwen kapilpene Nahna Saion.

⁵Ahpw ni ar mahsanihadahr duwen kahnimwo, re inenen dahkihla; re ahpw masepwehkada tangdoaui.

⁶Re masepwehkada oh rerrerki ar pwunod mwuledek, rasehngala lih liseian men me nektehn pahn neitik,

⁷re rasehngala sohp akan me kin pwungupwungudekseli nan madau ni ahnsou en melimel kehlail.

⁸Se patohwan rongehr dahme Koht ketin wiadahr, oh met se kilangehr nan kahnimw en at Koht, KAUN-O Wasa Lapalap; e pahn ketin sinsile kahnimwet kohkohlahte.

⁹Maing Koht, nan Tehnpasomwi, se kin patohwan medemedewe sapwellimomwi limpoak poatopoat.

¹⁰Wasa koaros aramas akan kin kapikapinga komwi, oh kapingpomwi kipedier sampah pwon. Komw kin ketin kakaunki ni me pwung;

¹¹tohn Saion koaros en nsenamwahula! Komw kin ketin kadeik ni me pwung; kahnimw en Suda kan en pil iang pereperen!

¹²Kumwail sapwellimen Koht aramas akan, kumwail kapar pidahki Saion, oh wadekada wasa kehlail kan en kahnimw wet;

¹³kumwail tehk mwahu kehl kan oh kasawih kelen mahwen kan, pwe kumwail en kak patohwanohng dih en mwuhr kan:

¹⁴“Koht menet, iei atail Koht kohkohlahte; e pahn kin ketin kahluwa kitail erein ahnsou me pahn kohdo kan.”