Read Pohnpeian Melkahka Kan 5 Bible Online

Melkahka Kan 5 - Pohnpeian bible

Melkahka Kan 5

¹Maing KAUN, komw ketin karonge ei pato kat oh pil ei tungoal sengloal.

²Maing ei Koht oh ei nanmwarki, komw ketin karonge ngilen ei pek sawas! Maing KAUN, I kin patohwan kapakapohng komwi;

³komwi kin ketin karonge ngileiet nimenseng. Ni dakadahn ketipin, I kin patohwan kapakap oh kin kasikasik pasapengpe sang rehmwi.

⁴Komwi Koht emen me sohte kin ketin kupwurperenki wiewia sapwung kan; komw sohte kin ketin mweidohng me suwed kan en mihmi mwohn silangmwi.

⁵Komw sohte kin ketin kupwurki aramas me aklapalap akan; komw kin ketin kalahdeki aramas suwed koaros.

⁶Komw kin ketin kamwomwala aramas likamw akan oh sohte ketin kupwurki me widingan oh sounkam aramas akan.

⁷Eri a, pwehki sapwellimomwi limpoak lapalap, I kak patohdo nan tehnpasomwi; I kak kaudok nan Tehnpasomwi sarawi oh poaridi ong komwi ni wahu lapalap.

⁸Maing KAUN, ei imwintihti kan me ngeder! Komw ketin kahluwa ie pwe I en kak kapwaiada kupwuromwien; komw ketin kasalehiong ie alomwi pwe I en kak idawehn komwi.

⁹I sohte kak likih dahme ei imwintihti kan ndinda; pwe ihte re men kauweiehla. Ar koasoi kan me lingan oh kansenamwahu, ahpw diren widing suwed.

¹⁰Maing Koht, komw ketin kadeikada oh kaloke irail, ar koasoandi kan en pein kauweirailla. Komw ketin kasareirailsang mwohn silangmwi pwehki tohtohn diparail kan oh ar kin kahngohdiong komwi.

¹¹Ahpw irail koaros me kin diar arail wasahn ruk rehmwi pahn kin pereperen; re kak kokoulki ar peren ahnsou koaros. Komw ketin sinsile irail kan me kin poakohng komwi; re kin nsenamwahu pwehki komwi.

¹²Maing KAUN, komw kin ketin kupwuramwahwih irail kan me kin peikiong komwi; sapwellimomwi limpoak rasehng mehnsansar ehu, me kin doandoare irail.