Read Pohnpeian Melkahka Kan 50 Bible Online

Melkahka Kan 50 - Pohnpeian bible

Melkahka Kan 50

¹KAUN-O Koht, Wasa Lapalap, ketin poahngok ong sampah pwon, sang palimese lel palikapi.

²Lingan en Koht kin dakerada wasa sang Saion, kahnimwo me lingan unsek.

³Atail Koht kin ketido, ahpw sohte ketin sopeimwekid; mwowe kisiniei mwehl me wie mpwumpwul, a melimel kehlail me kapilpene.

⁴E ahpw ketin malipe lahng oh sampah pwe en wia sounkadehdepen e pahn ketin kapwung sapwellime aramas akan.

⁵E ahpw mahsanih, “Kumwail kapokonedohng ie nei aramas loalopwoat akan, irail me wiadahr inou ong ie sang ni ar meirong kan.”

⁶Nanleng kan kin kalohki me Koht me pwung, oh pein ih me wia sounkopwung.

⁷“Kumwail, nei aramas akan, kumwail rong, pwe I pahn koasoi; I pahn kadehdehiong uhk, Israel, ngehi me Koht, omw Koht.

⁸I sohte kapwungohng uhk pwehki omw meirong kan, omw meirong isihs me ke kin wiahiong ie ahnsou koaros.

⁹Ahpw I sohte anahne ale kouwol sang nan sapwomw kan, de kuht sang ni noumw pelin kuht kan.

¹⁰Ngehi me naineki mahn en nanwel koaros oh pil kou kan me kin mihmiseli pohn dohl kid kan.

¹¹Ngehi me pil naineki menpihr en nan wehwe koaros, oh soangen mahn mour koaros me kin mi nansapw.

¹²“Ma I men mwengehda, I sohte pahn peki rehmw kisin mwenge, pwe sampah oh audepe kan koaros iei ahi.

¹³Ia duwe, ke lemehiong me I kin kang uduk en kouwol kan, de nim ntahn kuht kan?

¹⁴Omw meirong ong Koht en kin mihmi ni kapingkalahngan, oh ke en patohwanohng Wasa Lapalap soahng kaoros me ke inoukidahr.

¹⁵Likwerih ie ni ahnsou apwal; I pahn doareiukala, oh ke pahn kapinga ie.”

¹⁶Koht ketin mahsanihong aramas suwed, “Dahme ke papahngkihda ei kosonned akan? Dahme ke papahngkihda ei kosonned akan? Dahme ke kapakapahrengki duwen ei inowo?

¹⁷Ke suwediki I en kapwunguhkala; ke soikala ei kosonned akan.

¹⁸Ni omw kin kilang lipirap emen, ke kin wiahkihla kompoakepahmw, oh ke kin werekiong aramas en kamwahl akan.

¹⁹“Ahnsou koaros ke kin lokaia suwed; ke sohte kin peikasalki lokaia likamw.

²⁰Ke kin pein kedipahda riomw kan oh karaunmwahlih irail.

²¹Ke wiadahr soahng pwukat koaros, ahpw I nennenlahte, ke ahpw kihkihong me I duwehte kowe. Eri met, I pahn kapwung ong uhk, oh kasalehiong uhk ni sansal.

²²“Kumwail me kin mwamwahlikin ie, kumwail rong ie, pwe ma soh, I pahn kamwomwkumwailla, oh sohte emen me pahn kak doareikumwailla.

²³Me kin meirongkihong ie kapingkalahngan, iei irail me kin waunekin ie; oh I uhdahn pahn doareirailla koaros me kin peikiong ie.”