Read Pohnpeian Melkahka Kan 51 Bible Online

Melkahka Kan 51 - Pohnpeian bible

Melkahka Kan 51

¹Maing Koht, komw ketin kupwure ie nin duwen sapwellimomwi limpoak poatopoat. Komw ketin lapwahda dipei kan nin duwen sapwellimomwi kalahngan lapalap!

²Komw ketin widensang ei suwed koaros oh ketin kamwakeleiehda sang nan dipei kan!

³I ese duwen ei sapwung kan; dipei kan kin sansal ong ie ahnsou koaros.

⁴I dipadahr mwohmwihte-mwohmwihte kelehpw-% oh wiadahr sapwung mwohn silangmwi. Eri, komwi me pwung, ni omwi ketin kapwungohng ie, oh mwakelekel, ni omwi ketin kadeikiedahr.

⁵Aramas suwed men ngehi sang ni ei ipwidi; I kin mi pahn manaman en dihp, sang rahn me I ipwidi.

⁶Komw kin ketin anahne mohngiong lelepek oh mehlel; komw ketin audekihda ei lamalam sapwellimomwi kupwurokong.

⁷Komw ketikihsang ie nan dipei, I ahpw pahn mwakelekella; komw ketin kamwakeleiehda, I ahpw pahn pwetepwetala duwehte sinoh.

⁸Komw ketin kupwurehkin ie peren oh nsenamwahu; oh mehnda ma kakonei kat oh tih kat timpesengehr, a I pahn pwurehng nsenamwahula.

⁹Komw ketin sohpeiweisang dipei kan oh ketin lapwahda dipei kan koaros.

¹⁰Maing Koht, komw ketin wiahiong ie ehu mohngiong mwakelekel, oh ketikihong nan kapehdiet ehu ngehn kapw oh loalopwoat.

¹¹Komw dehr ketin keseieweisang mwohn silangmwi; komw dehr ketikihsang ie ngenomwi sarawi.

¹²Komw ketin kasapahldohng ie nan peren me kin kohsang ni sapwellimomwi komour, oh ketin kupwurehkin ineng en peikiong komwi.

¹³I ahpw pahn padahkihong me dipan akan sapwellimomwi kosonned akan, re ahpw pahn sapahldohng rehmwi.

¹⁴Maing Koht ei sounkomour, komw ketin doarehla mouri, I ahpw pahn nsenamwahuki lohkiseli sapwellimomwi pwung.

¹⁵Maing ei Kaun, komw ketin sewese ie pwe I en pato, oh I ahpw pahn kapinga komwi.

¹⁶Komwi sohte kin ketin anahne meirong, ma komw ketin anahne, I pahn wiahiong komwi; komw sohte kin kupwurperenki meirong isihs kan.

¹⁷Ei meirong, Maing Koht, iei koluhla mehlel en nan kapehdi; pwe komw sohte pahn ketin soikala koluhla mehlel oh peik en nan kapehd.

¹⁸Maing Koht, komw ketin kupwure Saion, oh ketin sewese; komw ketin kauwada sapahl kelen Serusalem.

¹⁹Eri, komwi ahpw pahn kupwurperenkihda meirong me konehng iangahki at meirong isihs kan; oh kouwol kan ahpw pahn meirongla pohn sapwellimomwi pei sarawi.