Read Pohnpeian Melkahka Kan 55 Bible Online

Melkahka Kan 55 - Pohnpeian bible

Melkahka Kan 55

¹Maing Koht, komw ketin karonge ei kapakap; komw dehr ketin sohpeisang ei pekipek!

²Komw ketin karonge ie oh sapeng ie; I inenen weikengkilahr ei pwunod akan.

³I masepwehngkidahr ngihl kamasepwehk en ei imwintihti kan, oh I ohkilahr tiahk kalok en aramas suwed kan. Re kin kahrehiong ie apwal laud; re kin lingeringer pahi oh kailongkin ie.

⁴I masepwehkadahr kowahlap, oh ahd en mehla katoutouwihielahr.

⁵Masak kipeiedier oh I wie rerrerki; I patohwan milahr nan masepwehk mwuledek.

⁶I ahpw men ei pehnpihr en mie duwehte mwuroi. I pahn pihrla oh diar wasahn ei kommoal.

⁷I pahn pihrlahng wasa me doh oh mihla nan sapwtehn.

⁸I men mwadang en diarada ei wasahn rukusang kisinieng laud oh engin melimel.

⁹Maing ei Kaun, komw ketin kapingada lokaia en ei imwintihti kan! I kilikilang tiahk en kamaramas oh moromor nan kahnimwo,

¹⁰ni rahn oh nipwong tiahk suwed kan kin kohkohseli pohn kelen kahnimwo, kadirehki dihp toutou oh kahpwal laud.

¹¹Wasa koaros mwomwlahr; nanial akan inenen diren widing oh kehnaudek.

¹²Ma imwintihti men me kin kapweikengih ie, I pahn kanengamahiong; ma peliei men me kin mwamwahlikin ie, I kak rukusang.

¹³Ahpw soh, pwe kowe me ei werek, iengei oh kompoakepahi mehlel.

¹⁴Kita kin koasoakoasoipene ni limpoak mehlel; kita kin ehupene ni ata kin kaudok nan Tehnpas Sarawio.

¹⁵Ei imwintihti kan en mehla mwohn ahnsoun arail mehla; re en mourte kohdihla nan sapwen me melahr akan! Mehkot suwed kin mihmi nan imwarail kan oh nan mohngiongirail kan.

¹⁶I ahpw patohwan likwerih KAUN-O Koht pwe en ketin sewese ie, eri e pahn ketin komouriehla.

¹⁷Nimenseng, nin souwas oh nipwong kaulim oh sengloal en nan kapehdiet kin leldalahng mwohn silangi, eri e pahn ketin karonge ngileiet.

¹⁸E pahn ketin doareiehla oh kapwureiehdo sang nan mahwen me I kin wia ong ei imwintihti ngedehrie.

¹⁹Koht, me ketin kakaun sang mwohn tepin kawa, pahn ketin karonge ie oh ketin kaloweiraildi; pwe re sohte men wiliakapwala, oh sohte kin masak.

²⁰Ei werek en mahso kin pelianda kompoakepah kan; e kauwehla eh inou kan.

²¹Eh koasoi kan me iou, ahpw nan kapehde diren kailok; eh lokaia kan me kansenamwahu, ahpw keng rasehng kedlahs.

²²Mweidohng KAUN-O omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.

²³Ahpw komwi, Maing Koht, pahn ketikilahng nan sousou aramas loallap suwed oh aramas likamw pwukan mwohn ar pahn lel ni elep en ar mour. Ahpw ngehi, I pahn likih komwi.