Read Pohnpeian Melkahka Kan 57 Bible Online

Melkahka Kan 57 - Pohnpeian bible

Melkahka Kan 57

¹Komw ketin kupwure ie, Maing Koht, komw ketin kupwure ie, pwe I patohdohng rapahki sawasepei rehmwi. I kin diar silepei pahn mwetehn nin limomwi kan lao I daulih soangen apwal koaros.

²I patohwan likwerih ei Koht, Wasa Lapalahpie, ei Koht, me kin ketikihong ie ei anahn akan koaros.

³E pahn ketin sapeng ie sang nanleng oh doareiehla; e pahn ketin kalowehdi irail kan me katoutouwihielahr. Koht pahn ketin kasalehiong ie sapwellime limpoak poatopoat oh loalopwoat.

⁴Ei imwintihti kan kin kapikapil ie, duwehte laion kei me kin men kang aramas. Ngihrail kan duwehte ketieu oh arep, lowarail kan duwehte kedlahs keng.

⁵Maing Koht, komw ketin kasalehda sapwellimomwi roson lapalap pahnlahng, oh sapwellimomwi lingan wasa koaros nin sampah.

⁶Ei imwintihti kan wiadahr lidip pwe re en kolkiniehdi; re katoutowihalahr ngeni kowahlap. Re weirada pwoahr ehu mwohi, ahpw re pein pwupwudiongehr loale.

⁷Maing Koht, ni ei koapworopwor unsek, I pahn koul oh kapinga komwi!

⁸Ngeni, pirada! Nei arp oh lair, kumwa pirada! I pahn pangenda ketipin.

⁹Maing ei Kaun, I pahn kapingkalahngan ong komwi nanpwungen wehi kan. I pahn kapinga komwi nanpwungen aramas akan.

¹⁰Sapwellimomwi limpoak poatopoat kipe wasa koaros nanleng; sapwellimomwi loalopwoat kin leldawohng pahnlahng.

¹¹Maing Koht, komw ketin kasalehda sapwellimomwi roson lapalap pahnlahng, oh sapwellimomwi lingan wasa koaros nin sampah.