Read Pohnpeian Melkahka Kan 58 Bible Online

Melkahka Kan 58 - Pohnpeian bible

Melkahka Kan 58

¹Ia duwe, kumwail kaun akan, me pwung audepen amwail kopwung kan? Kumwail kin wia kopwung en aramas koaros ni pwung pahrek?

²Pwe soh! Kumwail kin medemedewehte suwed me kumwail kak wiahda, oh wiahda sapwung mwuledek kan nan sahpwet.

³Aramas suwed kan kin sapwusapwung nan arail mour ahnsou koaros; re kin wiahda likamw sangete ni rahn me re ipwidi.

⁴Re diren pwoisin rasehng sineik kan; re kin pinahla salengarail kan duwehte soangen sineik kopra me salengepon,

⁵me sohte kin rong ngilen sounkemenda, de koulen sounakmanaman.

⁶Maing Koht, komw ketin kamwerehsang ngihn laion kommwad pwukat.

⁷Re en sohrala rasehng pihl me kin sohrdiong pahnpwehl; re en tiatihdi ohla rasehng dipwen nanial akan.

⁸Re en duwehla dendemwusi me kin mwerpeseng wiahla pwehl; re en duwehte seri pwelel me ipwidi mehla sohte mwahn kilang marain.

⁹Ni ar sasairki, re pahn palidi oh mengidi rasehng dihpw; oh engieng en Koht pahn ipirirailpeseng nindokon ar momour.

¹⁰Aramas pwung kan pahn perenda ni ar pahn udiahl me dipan akan ar pahn lokolok; re pahn ur nan ntahn aramas suwed akan.

¹¹Aramas akan ahpw pahn nda, “Mehlelete me aramas pwung kan kin ale ketingparail; mehlelete me mie Koht emen me kin kadeik sampah.”