Read Pohnpeian Melkahka Kan 59 Bible Online

Melkahka Kan 59 - Pohnpeian bible

Melkahka Kan 59

¹Maing ei Koht, komw ketin doareiesang ei imwintihti kan; komw ketin sileiesang me kin pelian ie.

²Komw ketin kapitiesang aramas loallap suwed pwuko; komw ketin kapitiehla sang sounkam aramas pwuko!

³Komw mahsanih! Re awiawih ie pwe re en kemeiehla; aramas lemei kei irail me pokonpenehr pwehn uhwong ie. Maing KAUN, kaidehn pwehki ei dipadahr de wiadahr sapwung ehu,

⁴de pwehki kisin sapwung kis me mie rehi, me re mwadamwadangkipenehng nan dewerail.

⁵Maing KAUN, Koht, Wasa Lapalap, komw ketida oh ketido sewese ie; Maing Koht en Israel! Komw pein ketin mahsanih! Komw ohpala wasa oh ketin kaloke me rotorot akan; komw dehr ketin kupwurkalahngan ong me loallap suwed akan!

⁶Re kin pwurodo nin soutik, wie ngiringir duwehte kidi ni ar kin kohkohseli nan kahnimwo.

⁷Komw karonge mahs ar lokaia kapweikeng oh kamasepwehk kan. Lowarail kan duwehte kedlahs nan awarail, re ahpw kin lemeleme me sohte me kin rong irail.

⁸Ahpw, Maing KAUN, komw kin ketin kiparamatkin irail; komw kin ketin wiahki me rotorot akan mehkot mwahl.

⁹I kin koapworopworki sapwellimomwi roson; Maing Koht, komwi me ei wasahn ruk.

¹⁰Ei Koht kin ketin loalloale ie oh pahn ketido rehi; e pahn ketin kasalehiong ie lohdi en ei imwintihti kan.

¹¹Maing Koht, komw dehr ketin kemeirailla, pwe nei aramas akan dehr manokehla. Ahpw komw ketin katangahkinirailpeseng sapwellimomwi roson lapalap oh kaloweiraildi, Maing ei Kaun, oh silepat.

¹²Dihp mi ni kilinawarail kan; arail koasoi kan koaros diren dihp; komw kupwure pwe arail koasoi kan en lidipihiraildi nan ar pohnmwahso! Pwehki ar kin lahlahwe oh lokaia likamw,

¹³komw ketin angiangih irail oh kamwomwirailla; komw kamwomwirailla douluhl. Pwe aramas koaros en patohwan ese me Koht kin ketin kakaun Israel, oh sapwellime manaman kin kipe wasa koaros nin sampah.

¹⁴Ei imwintihti kan kin pwurodo nin soutik, wie ngiringir rasehng kidi nindokon ar kin kokohseli nan kahnimwo,

¹⁵rasehng kidi me kin tangatangseli reperepen kisin mwenge oh kin wie ngiringir ma re sohte kin diar mehkot.

¹⁶A I pahn koulki duwen sapwellimomwi roson; nimenseng koaros I pahn kin kokoulki sapwellimomwi limpoak poatopoat. Komwi me ei wasahn ruk, oh perehpei ni ahnsoun ei apwal.

¹⁷I pahn kin kapinga komwi, ei soundoar. Ei wasahn ruk iei rehn Koht, Kohto me kin ketin poakohng ie.