Read Pohnpeian Melkahka Kan 60 Bible Online

Melkahka Kan 60 - Pohnpeian bible

Melkahka Kan 60

¹Maing Koht, komw ketin soingkitalahr oh kaloweikitdier; komw ketin engieng paht-ahpw met komw pwurehng ketin sapahldohng kiht.

²Komw ketin kupwurehda pwe sampah en rerada, oh pwelen sampah en pwalpeseng; komw ketin kamwahwihala ohla pwukat, pwe sahpwo nektehn mwerpeseng douluhl.

³Apwal tohto komw ketin mweidohng sapwellimomwi kan en lokolongki mwuledek; se kin sansasseli rasehng ma se sakaula.

⁴Komw ketin panawiher irail kan me kin wauneki komwi, pwe re en kak pitsang kauparail.

⁵Komw ketin komourkinkitala sapwellimomwi manaman; komw ketin sapeng at tungoal kapakap, pwe irail kan me komw kin ketin loalloale re en kapitipitla.

⁶Koht ahpw ketin poahngok sang nan mwoale sarawio, mahsanih, “Ni manaman en powehdi I pahn pwalangpeseng Sekem oh nehkpeseng Wahun Sukot rehn nei aramas akan.

⁷Ngehi me ahneki Kilead, oh pil Manase; Epraim iei ei lisoarop en mahwen oh Suda ei sokon en nanmwarki.

⁸Ahpw I pahn doadoahngki Mohap duwehte nei dahl en epwinek, I pahn kesehdiong pohn Edom ei suht, kilel en eh uhdahn ahi. Ia duwe tohn Pilisdia, re medemedewe me re pahn ngisingiski arail poweiehdi?”

⁹Maing Koht, ihs me pahn kahreielahng nan kahnimw kehlailo? Ihs me pahn waielahng Edom?

¹⁰Ia duwe, mehlel me komw ketin soingkitalahr? Komw sohte pahn ketin iang kahluwa at tungoal karis kan?

¹¹Komw ketin sewesei kiht pelian at tungoal imwintihti kan; sawas en aramas me mwahl oh sokatepe.

¹²Ma Koht pahn ketin ieiang kitail, kitail pahn powehdi; ih me pahn ketin kalowehdi atail imwintihti kan.