Read Pohnpeian Melkahka Kan 63 Bible Online

Melkahka Kan 63 - Pohnpeian bible

Melkahka Kan 63

¹Maing Koht, komwi me ei Koht, oh I patohwan ngoangki mi rehmwi. Paliwerei oh ngeni unsek kin inengieng komwi; ngeniet kin anahne komwi kowahlap, rasehng sahpw mengidi ehu me solahr pile.

²Komw mweidohng I en udiahl komwi nan mwoalomwi sarawi; komw mweidohng I en udiahl uwen sapwellimomwi manaman oh lingan.

³Sapwellimomwi limpoak poatopoat me mwahusang mour, iei me I pahn patohwan kapingahkin komwi.

⁴I pahn patohwan kapingkalahngan ong komwi erein ei mour; I pahn kapahdawohng komwi pehi kat ni ei pahn kapakap.

⁵Ngeniet pahn tungoal oh medla rasehng medla ni kamadipw laud, oh I pahn koulkihong komwi koulen kaping kaperen.

⁶Ni ei kin wendi nan kiei, I kin tamataman komwi; erein pwohngo pwon, I kin medemedewe komwi,

⁷pwehki omwi ketin wia sawasepei ahnsou koaros. I kin kokoulki ei peren pahn mwetehn nin limomwi kan.

⁸Ngeniet kin tengediong komwi, oh limomwien kin apwahpwalih ie.

⁹Irail kan me kin songosong kemeiehla pahn kohdihla nan wasahn me melahr akan.

¹⁰Re pahn kamakamala nan mahwen, oh kidien wel kan pahn kangala paliwararail kan.

¹¹Nanmwarkio pahn perenda; pwe Koht kin ketikihong en powehdi. Koaros me kin wiahda inou ni mwaren Koht pahn kapinga, a ewen me likamw akan pahn pinapinla.