Read Pohnpeian Melkahka Kan 64 Bible Online

Melkahka Kan 64 - Pohnpeian bible

Melkahka Kan 64

¹Maing Koht, I patohwan milahr nan apwal-komw ketin karonge ei kapakap! I patohwan masakadahr ei imwintihti kan-komw ketin komouriehla!

²Komw ketin sileiesang koasoandien aramas suwed kan, sang mwekid suwed en aramas mwersuwed kan.

³Re kin edehda lowarail kan oh keng rasehng kedlahs kei oh kin kadar lokaia samin rasehng arep.

⁴Re inenen pitipitiong kaparaseli ar tiahk kanamenek kan en lokaia likamw; re kin kamwomwki aramas mwahu kan arail karaunlikamw.

⁵Re kin ehukipene ar koasoandi suwed kan; re kin koasoiapene duwen wasa kan me re pahn koasoanehdi ie ar lidip kan. Re kin nda, “Sohte me pahn kilangada.”

⁶Re kin wiahda koasoandi suwed kan oh nda, “Kitail wiadahr koasoandi kaselel ehu en dihp koasukloal.” Audepen mohngiong oh kapehd en aramas mehkot rir.

⁷Ahpw Koht kin ketin kadar sapwellime arep pohn aramas akan oh re kin mwadang soahn.

⁸E pahn ketin kamwomwirailla pwehki lokaia pwuko; koaros me pahn udiahl irail pahn itikala moangarail kan.

⁹Irail koaros pahn masepwehkada; re pahn medemedewe dahme Koht ketin wiadahr oh koasoakoasoia wiepen nin lime kan.

¹⁰Aramas pwung kan koaros ahpw pahn perenda pwehki wiepen nin limen KAUN-O. Re pahn diar reh arail wasahn ruk oh meleilei; aramas mwahu kan koaros pahn kapikapinga.