Read Pohnpeian Melkahka Kan 66 Bible Online

Melkahka Kan 66 - Pohnpeian bible

Melkahka Kan 66

¹Aramas koaros en ngisingiski ar peren oh kapikapinga Koht!

²Kumwail koulki lingan en mware; kumwail kapingahki ih koulen kaping!

³Kumwail patohwanohng Koht, “Maing, ia uwen kapwuriamwei en wiepen nin limomwi kan! Sapwellimomwi manaman me lapalap mehlel kahrehda imwintihti kan kin poaridi mwohmwi ni lemmwin.

⁴Aramas koaros nin sampah kin kaudokiong komwi; re kin koulkihong komwi koulen kaping, re kin koul kapikapinga mwaromwi.

⁵Kumwail patohdo oh kadehde dahme Koht ketin wiadahr, wiepen nin lime kapwuriamwei kan nanpwungen aramas akan.

⁶E ketin wekidehngehr sehdo ni sahpw madekeng; atail pahpa kahlap ako kotehla pihlo sapasapal pohn pwehl. Se inenen perenkihda wiepen nin lime wasao.

⁷E kin ketin kaunkihda wasa sapwellime manaman kohkohlahte, oh e kin ketin mwasamwasahn wehi kan. Eri me kahngohdi kan re en dehr pelianda.

⁸Kumwail wehi kan koaros, kumwail kapinga atail Koht; ngilen amwail kaping en lelpeseng wasa koaros.

⁹Ih me ketin komokomour kitail oh sohte ketin mweidohng kitail en pwupwudi.

¹⁰Maing Koht, komw ketin songosong kiht; duwehte silper eh kin mwakelekelkihla kisiniei, iei duwen omwi kin ketin song kiht.

¹¹Komw ketin mweidohngkitehr se en lohdiong nan lidip oh ketikihong wisik toutou pohn pwopwat akan.

¹²Komw ketin mweidohngehr at imwintihti kan en tiangkitedi; se weweidier nan kisiniei oh nan lapake, ahpw met komw ketin kahluwaikitodohng wasa mwahu ehu.

¹³I pahn patohwanlahng nan tehnpasomwi ei meirong isihs; oh patohwanohng komwi dahme I inoukidahr.

¹⁴I pahn patohwanohng komwi dahme I inoukihong komwi ni ahnsou me I patopato nan apwal laudo.

¹⁵I pahn patohwando ekei sihpw en isihsla pohn pei sarawio; I pahn meirongkihong komwi kouwol oh kuht, oh edin meirong wet pahn edidawohng pahnlahng.

¹⁶Kumwail patohdo oh rong, kumwail koaros me kin wauneki Koht, I ahpw pahn koasoiaiong kumwail dahme e ketin wiahiongieier.

¹⁷I patohwan likweriong oh peki en ketin sewese ie; I patohwan koul kapinga ih.

¹⁸Ma I pohnsehsehla dipei kan, Kaun-o sohte pahn ketin karonge ie.

¹⁹Ahpw Koht ketin kupwureiehla; e ketin karonge ei kapakap.

²⁰I patohwan kapinga Koht, pwehki e sohte ketin soikala ei kapakap de katokehdi sapwellime limpoak poatopoat ong ie.