Read Pohnpeian Melkahka Kan 71 Bible Online

Melkahka Kan 71 - Pohnpeian bible

Melkahka Kan 71

¹Maing KAUN, I patohdo pahn kupwuromwi pwe komwi en ketin sinsile ie; Komw dehr ketin mweidohng I en lohdi!

²Pwehki omwi pwung, komw ketin sewese ie oh kapitiehla. komw ketin karonge ie oh doareiehla!

³Komw ketin wiahla ei paipalap kehlail ei wasahn silasil mwahu me pahn kepitiehla ahnsou koaros; pwe komwi me ei wasahn ruk oh doarepei.

⁴Maing ei Koht, komw ketin kapitiesang aramas suwed kan, sang ni manaman en me lemei oh suwed kan.

⁵Maing KAUN, Wasa Lapalap, komwihte me ei koapworopwor; komwihte me I kin likih sang ni ei tikitik.

⁶I likihkomwiher nan ei mour unsek; komw ketin sinsileieier sang ni ei ipwidi; I pahn kapinga komwi ahnsou koaros!

⁷Mouri wialahr mehn kalamangi ong me ngeder, pwehki komwi me soundoarepei kehlail.

⁸I kin kapikapinga komwi sang nimenseng lel nipwong oh kalohki sapwellimomwi lingan.

⁹Komw dehr ketin likidmelieiehla ni ei likeilapalahr, komw pil dehr ketin keseiehla ni ei luwetalahr.

¹⁰Ei imwintihti kan men kemeielahr; re ndindapene oh koasoakoasone ar pahn pelian ie.

¹¹Re ndinda, “Koht ketin likidmelielahr aramaso; kitail pwakih oh koledi, pwe sohte me pahn kapitala.”

¹²Maing Koht, komw dehr kin ketin dohweisang ie; Maing ei Koht, komw ketin sewese ie ahnsou wet!

¹³Irail akan me men mahweniong ie en lohdi oh mwomwla. Irail akan me men kauweiehla en namenekla oh paisuwedla.

¹⁴Ahnsou koaros I pahn kin koapworopworkin komwi; I pahn kalaudehla ei kaping ong komwi kohkohlahte.

¹⁵I pahn lohkiseli sapwellimomwi kupwur mwahu; I pahn koasoia duwen sapwellimomwi manaman en komour sang nimenseng lel nipwong, mehnda ma I sohte kin dehdehki duwe.

¹⁶I pahn weweidwei nan roson en KAUN-O ei Koht; I pahn kalohki sapwellimomwi kupwur mwahu, pwe komwihte me sapwellimaniki.

¹⁷Komw ketin padahkieier sang ni ei tikitik, oh lel met I pil lohlohkiseli sapwellimomwi wiewia kapwuriamwei kan.

¹⁸A met ni ei mahlahr oh moangepwetalahr, Maing Koht, komw dehr ketin likidmelieiehla! Komw ketin ieiang ie nindokon ei pahn kalohki sapwellimomwi roson oh manaman ong dih en mwuhr kan.

¹⁹Maing Koht, sapwellimomwi pwung me ileilehie. Komw ketin wiahda doadoahk kesempwahlie; sohte emen me rasehng komwi.

²⁰Komw ketikihongieier apwal oh lokolok, ahpw komwi pahn pwurehng ketin kakehlaiehda; komw pahn ketin nekidiehla sang mehla.

²¹Komw pahn ketin kaileiehda kohkohlahte; komw pahn ketin pwurehng kansenamwahwihiehla.

²²I uhdahn pahn kapingahkin komwi ngilen nei keseng arp; Maing ei Koht, I pahn kapinga sapwellimomwi loalopwoat. I pahn kesengki nei arp oh koulkihong komwi koulen kaping, ong komwi Me Sarawien Israel.

²³I pahn kin weriwerki ei peren nindokon ei pahn kesengiong komwi; paliwereiet oh ngeni unsek pahn iang koul pwehki omwi ketin doareielahr.

²⁴I pahn kalohkiseli sapwellimomwi pwung sang nimenseng lel nipwong, pwehki irail kan me men kauweiehla re lohdier oh nameneklahr.