Read Pohnpeian Melkahka Kan 72 Bible Online

Melkahka Kan 72 - Pohnpeian bible

Melkahka Kan 72

¹Maing Koht, komw ketin padahkih nanmwarkio pwe en wia kopwung nin duwen sapwellimomwi pwung; komw ketikihong sapwellimomwi pwung,

²pwe en kin kaunkihda sapwellimomwi aramas akan pwungen kosonned oh me toutoulahr akan pwung pahrek.

³Paiamwahu oh popohl en keirda nan wehiet; oh pwungen kosonned en lelpeseng rehn tohn wehiet koaros.

⁴Nanmwarkio en kin ketin kapwung me semwehmwe kan ni pwung pahrek; en ketin sewese me paisuwedlahr akan oh ketin kalowehdi me kin kaloke irail kan.

⁵Sapwellimomwi aramas akan en kin kaudokiong komwi erein ketipin eh kin dakedaker wasa, erein maram eh kin kamakamarainih wasa kohkohlahte.

⁶Nanmwarkio en rasehng keteu me kin mwerediong pohn pwehl, rasehng pilen keteu me kin pwupwudiong nansapw.

⁷Pwungen kosonned en kin pweidamwahu nan sapwellime mwehi, oh paiamwahu oh popohl en kin poatopoat erein maram eh kin kamakamarainih wasa.

⁸Irepen sapwellime wehi pahn sang ni ehu madau lellahng ni ehu, sang Iupreitis lellahng ni irepen sampah.

⁹Tohn nan sapwtehn kan pahn kin poaridi mwowe; sapwellime imwintihti kan pahn kin poaridiong nanpwel.

¹⁰Nanmwarki kan en Spein oh en deke kan pahn kin kisikise; nanmwarkien Sipa oh Sepa pahn kin ketikidohng mehn meirong kan.

¹¹Nanmwarki koaros pahn kin ketin poaridihsang; wehi koaros pahn kin papah.

¹²E kin ketin kapitala me semwehmwe kan me kin likweriong, oh pil irail kan me paisuwedlahr oh me lekdekla kan.

¹³E kin ketin kupwurkalahngan ong me luwet oh semwehmwe kan; e kin doarehla mouren me paisuwed kan.

¹⁴E kin ketin kepitirailla sang nan arail kehnaudek oh angkehlail kan; e kin ketin kesempwalki ar mour.

¹⁵Nanmwarkio en rosorosonte! En kin ketiki kohl sang Arepia; aramas en kin kapakapki ahnsou koaros; kupwuramwahu en Koht en kin ieiang met oh pil kohkohlahte!

¹⁶Reken wahn pilawa en kin wiewiawihte nan wehiet; wahnsahpw en kin kipehdi dohl akan, rek oh wohkian duwehte wahnsahpw en Lepanon. Kahnimw kan en direkihla aramas ngeder, rasehng dihpw kan me kin keirda nansapw.

¹⁷Mware en kin poatopoat kohkohlahte; oh en ndand erein ketipin eh kin dakedaker wasa. Wehi koaros en kin peki rehn Koht en ketin kupwuramwahwih irail duwen eh ketin kupwuramwahwiher nanmwarkio.

¹⁸Kitail kapinga KAUN-O, Koht en Israel! Pwe ihete me kin ketin wiahda soahng kapwuriamwei pwukat.

¹⁹Kitail kapinga lingan en mware kohkohlahte! Sapwellime lingaling en kadirehla sampah pwon. Amen! Amen!

²⁰Met iei imwilahn kapakap akan en Depit, nein Sehsi.