Read Pohnpeian Melkahka Kan 73 Bible Online

Melkahka Kan 73 - Pohnpeian bible

Melkahka Kan 73

¹Mehlel Koht me ketin kalahngan ong Israel, ong irail kan me nan kapehd mwakelekel.

²Kereniongehr ei koapworopwor pahn sohla; oh ei pwoson tikitiklahr

³pwehki ei peiriniong me aklapalap akan ni ei kilang duwen me suwed akan ar kepwehpwe.

⁴Soangen lokolok laud kan sohte kin lelohng irail; re kin kehlail oh sohte kin soumwahu.

⁵Re sohte kin diar apwal duwehte aramas teikan; re sohte kin kedirepwki apwal en meteikan.

⁶Re kin kapwatki aklapalap duwehte elin kapwat nin tepin wararail oh lemei me wia arail likou puhp;

⁷mohngiongirail kan kin kapwilewei suwed tohr, oh loalarail kin diren lamalam suwed.

⁸Re kin kouruhrki meteikan oh koasokoasoiapene duwen mehkan me suwed; re me aklapalap oh kin koasoakoasoia duwen ar pahn kauwe meteikan.

⁹Re kin lahlahwe Koht nanleng oh kin wia kosonned kehlail ong tohn sampah.

¹⁰Eri, sapwellimen Koht aramas akan pil kin iangirailla oh kamehlele mehkan koaros me re kin nda.

¹¹Re nda, “Koht sohte pahn mwahngih; Wasa Lapalahpieo sohte pahn ketin diarada.”

¹²Iei duwen met iren me suwed akan. Re kin paiamwahu oh kekeirda ahnsou koaros nan ar pai.

¹³Eri dah, sohte pahn katepen ei mour mwakelekel oh sohte wiahda dihp?

¹⁴Maing Koht, komw kin ketin kaloke ie rahn ehu pwon; nimenseng koaros I kin ale lokolok sang rehmwi.

¹⁵Ma I ndaier soahng pwukat, eri, I sohte pahn mwomwehda me ngehi emen sapwellimomwi aramas.

¹⁶I song en dehdehkihla irair apwal wet, ahpw e inenen apwal ong ie

¹⁷I lao patohlong nan Tehnpasomwio, I ahpw dehdehkihla dahme pahn wiawihong aramas suwed akan.

¹⁸Komwi pahn ketikiniraildiong wasa likekiris kei oh ketin sikeniraildi pwe re en mwomwla!

¹⁹Re ahpw mwadangete mwomwla; imwilahrail meid kamasepwehk.

²⁰Maing ei Kaun, re rasehng ouraman ehu me kin sohrala nimenseng; ni omwi ketin pirida, re solahr mie.

²¹Ni ei lamalam eh suwedla oh I pil nsensuwedla,

²²I pweipweila duwehla mahn emen; I sohla patohwan wehwehkin komwi.

²³Eri soh, pwe I pahn patopatohte rehmwi, oh komwi kin ketin kolokolete pehiet.

²⁴Komw kin ketin kahluwahkin ie sapwellimomwi kaweid, oh ni imwihla komw pahn ketin kasamwo ie nan sapwellimomwi lingan.

²⁵Sohte mehkot me ahi nanleng, pwe komwihte! Dahme I pahn inangih nin sampah ma kaidehk komwi?

²⁶Ngeniet oh paliwereiet kak luwetala, a Koht me kehlpei; ihete me I kin anahne kohkohlahte.

²⁷Mehlel, irail kan me kin mweisang komwi pahn sohrala; komwi pahn ketin kesepwekehla irail kan me soaloalopwoat ong komwi.

²⁸A duwen ngehi, ia uwen kesempwal en ei karanih Koht, pwe I en diar silepei rehn KAUN-O Koht, Wasa Lapalahpie oh I en kalohki wiepen nin lime kan koaros!