Read Pohnpeian Melkahka Kan 76 Bible Online

Melkahka Kan 76 - Pohnpeian bible

Melkahka Kan 76

¹Mehn Suda kan kin patohwan ese Koht; mware me wahun mehlel nan wehin Israel.

²Mwoale kin mi Serusalem; e kin ketiket pohn Nahna Saion.

³Ih wasao me e ketin karihspeseng nein imwintihti kan neirail arep kan, nair mehnsansar kan oh kedlahs kan, pil iangahki ar tehtehn mahwen koaros.

⁴Maing Koht, ia uwen omwi lingan! Ia uwen lingaling, ni omwi kin ketin sapahldo sang pohn nahna kan, wasa komw kalowedier ie sapwellimomwi imwintihti kan.

⁵Nair sounpei kommwad akan pehdsangehr ar tehtehn mahwen koaros oh re memeirier met nan dewen me melahr akan; sohte kisin katep kis mie ong ar kehlail oh koahiek kan.

⁶Maing Koht en Seikop, ni omwi ketin kamasak kin irail omwi engieng, oahs kan oh me dake kan pwupwudiong nanpwel oh mehla.

⁷Ahpw, maing KAUN, aramas koaros kin lemmwiki komwi. Sohte me kak uh mwohn silangmwi ni ahnsoun omwi engieng.

⁸Komw kin ketin kapwilodohng kiht audepen omwi kopwung sang nanleng; eri sampah pwon kin masepwehkada oh nennenla,

⁹ni omwi ketida pwehn kasalehda pwunglahn sapwellimomwi kopwung, ong ni komourlahn me toutoulahr kan koaros en sampah.

¹⁰En aramas lingeringer pahn kin wekidekiong ni kapingpomwi; oh koaros me luhwehdi nan mahwen kan pahn ehupene wia kaudokiong komwi.

¹¹Kumwail patohwanohng KAUN-O, amwail Koht, dahme kumwail inoukihong; kumwail wehi keren kan, kumwail patohwandohng amwail kisakis kan. Koht kin ketin kupwurki wiahiong aramas koaros en lemmwiki;

¹²e kin ketin katikala soupeidi aklapalap akan oh kin ketin kamasakada nanmwarki kan.