Read Pohnpeian Melkahka Kan 81 Bible Online

Melkahka Kan 81 - Pohnpeian bible

Melkahka Kan 81

¹Kumwail ngisingiski amwail peren ong Koht atail soundoar; kumwail koul kapikapinga Koht en Seikop!

²Kumwail tiakada melkahka oh kesengki dampwurin kan; kumwail kesengki ngilen keseng kaperen ni noumwail arp oh lair kan.

³Kumwail peuk koronihda ni kasarawien kamadipw, ni ahnsoun pwulodohn maram oh ni ahnsou me e kin mat.

⁴Met kosonned en wehin Israel, koasoandi ehu sang Koht en Seikop.

⁵E ketikihong mehn Israel ko ni eh ketin mahweniong mehn Isip. I rongorong ngihl sohte dehde ieu me mamahsanih,

⁶“I kihsangehr pohn pwopwomwail kan amwail wisik toutou kan; ngehi me mweidohng kumwail en kihsang pohmwail kasukasuk en takai weitahta kan.

⁷Ni amwail kin mihla nan apwal laud, kumwail kin likwerih ie, oh I kin doareikumwailla. I kin sapeng kumwail sang nan ei wasahn ruk nan melimel. I kasongosongei kumwail ni pwarer en Meripa.

⁸Nei aramas akan, kumwail rong ei kehkehliket; Israel, ia uwen ei men ke en rong ie!

⁹Ke sohte mwahn pahn kaudokiong emen koht tohrohr.

¹⁰Ngehi me KAUN-O, omw Koht, me waiukodo sang nan Isip. Sarapeseng, I ahpw pahn katungoaleiuk.

¹¹“Ahpw nei aramas akan sohte kin men rong ie; Israel sohte kin peikiong ie.

¹²Eri, I mweidohng irail en keptakai weweidwei nan elen nsenarail oh wiewia dahme re mwahuki.

¹³Ia uwen ei men nei aramas akan en kin rong ie; oh ia uwen ei men re en kin peikiong ie!

¹⁴I pahn mwadang kalowehdi ar imwintihti kan oh powehdi koaros me kin pelian irail.

¹⁵Irail kan me kin kailongkin ie pahn masakiehla oh poaridi mwohi; arail kalokolok pahn kohkohlahte.

¹⁶Ahpw I pahn katungoalehkin kumwail pilawa me keieu kaselel oh kamedkinkumwailla suke en loangalap.”