Read Pohnpeian Melkahka Kan 84 Bible Online

Melkahka Kan 84 - Pohnpeian bible

Melkahka Kan 84

¹Maing KAUN, Wasa Lapalap, ia uwen ei poakohng Tehnpasomwi Sarawio!

²Ia uwen ei anahne mi wasao! I ngoangkilahr iang mi nan kelen Tehnpas en KAUN-O. Paliwereiet oh ngeni unsek kin kokoulki ei peren ong Koht ieias.

³Menpihr kan wiadahr pasahr loale, re pil diaradahr dewehr wasao; re ahpw kin neineitik limwahn sapwellimomwi pei sarawi kan, Maing KAUN, Wasa Lapalap, ei nanmwarki, oh ei Koht.

⁴Meid pai irail kan me kin kousoan nan Tehnpasomwi Sarawio, kokouliong oh kapikapinga komwi ahnsou koaros.

⁵Meid pai irail kan me kin ale kehlparail sang rehmwi, oh kin ngoangki iang seiloakowohng pohn Nahna Saion.

⁶Ni ar kin keid nan wahu madekeng en Paka, e kin wiahla utuhnpihl; keteu en menseng ahpw kin kadirekihla pihl wasao.

⁷Ni ar kin kohkohwei, re kin kekehlailla; re ahpw pahn udiahl Koht en koht akan nan Saion.

⁸Maing KAUN, Koht Wasa Lapalap, komw ketin karonge ei kapakapet; komwi Koht en Seikop, komw ketin karonge ie!

⁹Maing Koht, komw ketin kupwuramwahwih at nanmwarki, nanmwarkio me pein komwi ketin pilada.

¹⁰Pwe rahnteieu nan Tehnpasomwi Sarawio mwahusang rahn kid wasa teikan; ei kin mihmi ni wenihmwen tehnpas en ei Koht mwahusang kousoan nan imwen aramas suwed akan.

¹¹KAUN-O iei ih me silepatail oh atail nanmwarki lingan, me kin kupwuramwahwihkin kitail kalahngan oh wahu. E sohte kin ketin soikala mehkot mwahu sang irail me kin kapwaiada me pwung.

¹²Maing KAUN, Wasa Lapalap, meid pai irail kan me kin likih komwi!