Read Pohnpeian Melkahka Kan 85 Bible Online

Melkahka Kan 85 - Pohnpeian bible

Melkahka Kan 85

¹Maing KAUN, komw ketin kupwurkalahnganongehr sapwellimomwi wehiet; komwi me ketin pwurehng kakepwehpwehla Israel.

²Komw ketin mahkikihongehr dipen sapwellimomwi aramas akan oh ketin mahkohng arail sapwung kan koaros.

³Komw ketin katokihedi sapwellimomwi kupwur toutou oh ketin wekideweisang irail sapwellimomwi engieng.

⁴Maing Koht at sounkomour, komw ketin kasapahlkitodohng rehmwi, oh ketin katokihedi sapwellimomwi kupwur toutou ong kiht!

⁵Ia duwe, komw pahn ketin engieng paht kohkohlahte? Omwi engiengen sohte pahn tokedi?

⁶Komw ketin pwurehng kakehlaikitada, eri kiht, sapwellimomwi aramas akan, pahn kapikapinga komwi.

⁷Maing KAUN, komw ketin kasaledohng kiht sapwellimomwi limpoak poatopoat, oh ketikihong kiht sapwellimomwi sawas en komour.

⁸I kin patohwan rongorong dahme KAUN-O Koht kin ketin mamahsanih; e ketin inoukihong kitail popohl, ong pein sapwellime aramas akan, ma kitail sohte pahn pwurehng atail wiewiahn pweipwei kan.

⁹Mehlel, e pahn kamourala me kin wauneki kan, oh sapwellime lingan en komour pahn ketiket nan sapwatail.

¹⁰Limpoak oh loalopwoat ahpw pahn wiakihteieu kohdo; pwung oh popohl ahpw pahn tuhpene.

¹¹Atail loalopwoat ahpw pahn wosada sang nan sampah, oh pwungen Koht ahpw pahn iroirdihdo sang nanleng.

¹²KAUN-O pahn ketin kakepwehpwehkitailla, oh wahnsapwatail kan pahn kaparaparala.

¹³Pwung ahpw pahn kin tieng mwohn KAUN-O pwe en kaunopada sapwellime ahl.