Read Pohnpeian Melkahka Kan 87 Bible Online

Melkahka Kan 87 - Pohnpeian bible

Melkahka Kan 87

¹KAUN-O ketin kauwada sapwellime kahnimw pohn dohl sarawio;

²e kin ketin loalloale kahnimw Serusalem laudsang wasa teikan nan Israel.

³Rong mahs, kowe, kahnimw en Koht, irair kapwuriamwei kan me e pahn mahsanih duwen kowe:

⁴“Ni ei pahn pahngada wehi kan me kin peikiong ie I pahn iangahkihong Isip oh Papilonia. I pahn pil mahsanih tohn Pilisdia, Dair oh Idiopia, pwe irail pil kisehn Serusalem.”

⁵A duwen Saion aramas koaros pahn ketihtihki me wehi koaros tepisang reh oh pein Wasa Lapalap pahn ketin kakehlahda Saion.

⁶KAUN-O pahn ketin ntingihedi nan doaropwe eden aramas koaros oh ketin wiahkihla irail koaros pwilidak en Serusalem.

⁷Re kahlek oh kokoulki, “Atail paiamwahu kan koaros kin tepisang Saion.”