Read Pohnpeian Melkahka Kan 89 Bible Online

Melkahka Kan 89 - Pohnpeian bible

Melkahka Kan 89

¹Maing KAUN, I pahn kin koulki sapwellimomwi limpoak poatopoat; I pahn kalohki sapwellimomwi loalopwoat kohkohlahte.

²I patohwan ese me sapwellimomwi limpoak pahn kin poatopoatete, oh sapwellimomwi loalopwoat kin duweduwehte sohte wekila, rasehng pahnlahng.

³Komw ketin mahsanih, “I wiadahr inou ehu ong emen me I piladahr; I inoukihong ei ladu Depit,

⁴‘Emen sang kadaudokomw kan pahn kin nanmwarki ahnsou koaros; I pahn kin kolokol teng omw wehi kohkohlahte.’ ”

⁵Maing KAUN, tohn nanleng kan kin koulkihong komwi soahng kapwuriamwei kan me komw kin ketin wiahda; re kin koul kapikapinga sapwellimomwi loalopwoat.

⁶Maing KAUN, sohte emen nanleng me rasehng komwi; sohte tohn nanleng men me pahrekiong komwi.

⁷Irail me sarawi kan kin masak komwi; irail koaros kin lemmwikin komwi.

⁸Maing KAUN, Koht Wasa Lapalap, sohte me kin ahneki manaman lapalap duwehte komwi; Maing KAUN, komwi me ketin loalopwoat ni mehkoaros.

⁹Komw kin ketin kakaun manaman laud en madau kan; komw kin ketin kameleileidi iloak laud kan.

¹⁰Komw ketin kalowehdi Rahap, mahn kamasepwehko, oh ketin kemehla; komw ketin powehkihdi sapwellimomwi roson lapalap sapwellimomwi imwintihti kan.

¹¹Sampah, iei sapwellimomwi, nanleng pil duwehte; komw me ketin wiahda sampah oh audepe kan koaros.

¹²Komw me ketin kapikada paliepeng oh palieir; Nahna Tapor oh Nahna Ermon kin pereperen kokouliong komwi.

¹³Ia uwen laud en sapwellimomwi manaman! Ia uwen lapalap en sapwellimomwi roson!

¹⁴Sapwellimomwi wehi poahsoankihda pwungen kosonned oh pwuhng pahrek; limpoak oh loalopwoat kin sansal ni mehkoaros me komw kin ketin wia.

¹⁵Meid pai aramas akan me kin kokoul kaudokiong komwi, me kin momour nan marain en sapwellimomwi kadek.

¹⁶Pwehki komwi re kin pereperen sang nimenseng lel nipwong, oh kapikapinga sapwellimomwi kalahngan lapalap.

¹⁷Komw ketikihong kiht manaman laud en powehdi pak ngeder; sapwellimomwi limpoak me kin kahrehiong kiht en powehdi.

¹⁸Maing KAUN, komwi me kin ketin pilohng kiht silepat; komwi, me Koht Sarawien Israel, komwi me ketikihong kiht at nanmwarki.

¹⁹Nan peudiahl ehu mahsie komw ketin mahsanihong sapwellimomwi ladu loalopwoat ko, “ I sewesedahr sounpei ndand emen; I piladahr mehmen sang nanpwungen aramas akan oh ketikihong mwoale.

²⁰I kasapwiladahr ei ladu Depit pwehn nanmwarkihla ni ei keiehki leh sarawi.

²¹Ei roson pahn kin ieiang ih ahnsou koaros, oh ei manaman pahn pil kakehlahda.

²²Sapwellime imwintihti kan sohte pahn kin pweida ni ar pahn kin pelianda; oh aramas suwed kan sohte pahn kalowehdi.

²³I pahn tiakpeseng oh kauwehla sapwellime imwintihti kan, oh kemehla koaros me kin kailongki.

²⁴I pahn kin loalloale ahnsou koaros oh loalopwoatohng; I pahn kin koasoanehdi pwe en kin powehdi sapwellime imwintihti kan ahnsou koaros.

²⁵I pahn kalaudehla sapwellime wehi sang Mediderenian lel ni Pillap Iupreitis.

²⁶E pahn kin mahsanihong ie, ‘Komwi me semei oh ei Koht; komwi me silepei oh sounkomourpei.’

²⁷I pahn wiahkihla ih nei mesenih, me pahn lapalap sang nanmwarki kan.

²⁸I pahn kin dadaur ei inou ong ih ahnsou koaros, oh inou wet pahn kin poatopoat kohkohlahte.

²⁹Kadaudoke men pahn kin nanmwarki ahnsou koaros; sapwellime wehi pahn poatopoat duwehte pahnlahng.

³⁰“Ahpw ma kadaudoke kan pahn kauwehla ei kosonned akan oh sohte weweidki ei koasoandi kan,

³¹ma re pahn mwamwahliki ei kaweid kan oh sohte kapwaiada ei kosonned akan,

³²eri I pahn kaloke irail pwehki diparail kan; I pahn kemehkin irail ar sapwung kan.

³³Ahpw I sohte pahn katokihedi ei limpoak ong Depit oh I sohte pahn kasapwungehla ei inou ong ih.

³⁴I sohte pahn kauwehla ei inou ong ih, de kapweiekidi ehute inou me I wiahiong.

³⁵“I inoukihda ni mwarei sarawi pahn pak teieu: I sohte pahn wiahda likamw ong Depit.

³⁶Kadaudoke kan pahn kin poatopoat ahnsou koaros, oh I pahn kin sinsile sapwellime wehi erein ketipin eh pahn kin dakedaker wasa.

³⁷E pahn poatopoat rasehng maram, me wia mehn kadehdepen eh loalopwoato pahnlahng.”

³⁸Ahpw komw ketin engiengda pahn sapwellimomwi nanmwarki me pilipilda; komw ketin kesehla oh soikeweisang rehmwi.

³⁹Komw ketin katokedier sapwellimomwi inou ong sapwellimomwi ladu oh ketin kesehdiong nanpwel sapwellime nihn.

⁴⁰Komw ketin karengkehdi kelen sapwellime kahnimw oh ketin kauwehla sapwellime wasahn mahwen kan.

⁴¹Koaros me kin keid wasao kin pirapahsang sapwellime dipwisou kan; mehn mpe kan koaros kin kouruhrki.

⁴²Komw ketikihong sapwellime imwintihti kan manaman en powehdi; komw ketin kahrehiong irail koaros re en kin pereperen.

⁴³Komw ketin wiahiong pwe sapwellime tehtehn mahwen kan en sohla katepe oh ketin mweidala pwe en lohdi nan mahwen.

⁴⁴Komw ketikihsang sapwellime sokon en nanmwarki oh ketin sikendiong mwoahle nanpwel.

⁴⁵Komw ketin wiahkihla ih ohl laud emen mwohn eh ahnsou oh ketin kadirehkihla paisuwed mehlel.

⁴⁶Maing KAUN, komw pahn karirih komwihla kohkohlahte? Ia erein sapwellimomwi engieng eh pahn lullul rasehng kisiniei?

⁴⁷Komw ketin tamanda ia uwen mwotomwot en ei mour; tamataman me komwi me ketin wiahda kiht aramas me pahn mehla!

⁴⁸Ihs me kak momourte oh sohte mehla? Ia duwen aramas emen eh pahn iredihsang pein ih eh sousou?

⁴⁹Maing at Kaun, ia kasalepen sapwellimomwi limpoak en mahso? Ia sapwellimomwi inou ko me komw ketin wiahiong Depit?

⁵⁰Komw dehr meliehla duwen aramas akan ar kin lahlahwe ie, sapwellimomwi ladu menet, duwen ei kanengamahiong en me rotorot kan ar lahlahwe ie.

⁵¹Maing KAUN, sapwellimomwi imwintihti kan kin lahlahwe sapwellimomwi nanmwarki pilipilda! Re kin lahlahwe wasa koaros me e kin ketila ie.

⁵²Kapinga KAUN-O kohkohlahte! Amen! Amen!