Read Pohnpeian Melkahka Kan 91 Bible Online

Melkahka Kan 91 - Pohnpeian bible

Melkahka Kan 91

¹Mehmen me kin diar eh wasahn ruk rehn KAUN-O, mehmen me kin mihmi pahn silepen Wasa Lapalapo,

²iei ih me kak patohwanohng Koht, “Komwi me soundoarepei oh silepei. Komwi me ei Koht; me I kin likih.”

³E pahn ketin doareiukasang me keper rir koaros, oh sang soangen soumwahu koaros me kin kemehla aramas.

⁴E pahn ketin koaduhpwalkinuhkedi lime kan; ke sohte pahn perki mehkot pahn epwelpen nin lime; sapwellime loalopwoat pahn sinsileiuk oh doareiukala.

⁵Ke sohla pahn masak mehkot me keper nipwong, de mahwen karuaru ong uhk ni rahn,

⁶de soumwahu lusulus kan me kin wawaiseli nan rotorot, de soangen suwed teikan me kin kemehla aramas nin rahn.

⁷Aramas kid kak pwupwudi mehla limwahmw, de aramas nen pil pahn kak kapiluhkpene, ahpw sohte me pahn kauweiukala.

⁸Ke pahn pein kilangki mesomwen, oh kadehde duwen me suwed akan ar pahn ale kalokolok.

⁹Pwehki omw wiahkihla KAUN-O doarepomw, oh wiahkihla Wasa Lapalahpie silepomw,

¹⁰iei me sohte me suwed kot pahn lelohng uhk, sohte kalokolok ehu pahn kerendohng imwomw.

¹¹Koht pahn ketin kesilehkinuhk sapwellime tohnleng kan, pwe re en apwahpwalihiuk wasa koaros me ke pahn kohla ie.

¹²Re pahn kolkinuhkada pehrail kan, pwe ke dehr dipekelekel nin takai kan.

¹³Ke pahn sok pohn laion oh sineik kan, pohn laion kommwad oh sineik me pwoisin kan.

¹⁴Koht ketin mahsanih, “I pahn komourala irail kan me kin poakohng ie oh I pahn sinsile irail kan me ese me ngehi iei KAUN-O.

¹⁵Ni ar pahn likwerih ie, I pahn sapeng irail; ni ar pahn lelohng nan apwal, I pahn ieiang irail. I pahn kapitirailla oh kawauwihirailla.

¹⁶I pahn katingihkin irail mour werei; oh I pahn komourirailla.”