Read Pohnpeian Melkahka Kan 97 Bible Online

Melkahka Kan 97 - Pohnpeian bible

Melkahka Kan 97

¹KAUN-O me nanmwarki! Sampah, ke en nsenamwahu! Perenda, kumwail deke kan en nan madau!

²Depwek oh rotorot mosul kin kapilpene ih; e kin ketin kaunda ni pwuhng oh mehlel.

³Kisiniei kin tieng mwowe oh kamwakamwasika sapwellime imwintihti kan me kapilpene.

⁴Sapwellime lioal kin kamarainihada sampah; sampah kin kilang oh kin rerrerki.

⁵Dohl akan kin peipeseng rasehng kirihs mwohn silangin KAUN-O, mwohn silangin Kaunen sampah pokon.

⁶Nanleng kan kin lohkiseli sapwellime pwuhng, oh wehi koaros kin kilang sapwellime lingaling.

⁷Irail koaros me kin pwongih dikedik en eni kan kin namenekla; oh koht akan koaros kin poaridi mwohn KAUN-O.

⁸Maing KAUN, pwehki sapwellimomwi kopwung kan tohn Saion kan kin nsenamwahula, oh kahnimw en Suda kan kin perenda,

⁹Maing KAUN, Wasa Lapalap, komwi me kin kaunda sampah pokon; komwi ketin lapalap sang koht akan koaros.

¹⁰KAUN-O kin ketin loalloale irail kan me kin kailongki me suwed; e kin ketin sinsile mour en sapwellime aramas akan; e kin ketin kapitirailla sang pahn manaman en aramas suwed kan.

¹¹Marain kin dakedaker pohn aramas pwung kan, oh nsenamwahu pohn me mwahu kan.

¹²Kumwail koaros me pwung kan, kumwail nsenamwahula pwehki wiepen nin limen KAUN-O! Kumwail tamataman dahme Koht me sarawio ketin wiadahr, oh kapingkalahngankihong.