Read Pohnpeian Melkahka Kan 98 Bible Online

Melkahka Kan 98 - Pohnpeian bible

Melkahka Kan 98

¹Kumwail koulki apwoat koul kapwen ong KAUN-O; e ketin wiadahr soahng kapwuriamwei kei! Sang ni pein sapwellime manaman oh roson sarawi e ketin powehdier.

²KAUN-O ketin lohkidahr sapwellime powehdi; e ketin kasalehiong wehi kan sapwellime manaman en komour.

³E ketin dadaurete sapwellime inou ong mehn Israel kan ni loalopwoat oh limpoak poatopoat ong irail. Aramas koaros wasa koaros udiahlehr manaman en powehdi en atail Koht.

⁴Kumwail koaros tohn sampah, kumwail koulki koulen peren ong KAUN-O; kumwail kapingahki amwail koul kan oh ngisingiski amwail peren!

⁵Kumwail koul kapikapinga KAUN-O! Kumwail kesengki noumwail arp kan!

⁶Kumwail peuk sowi oh koronida kan, oh ngisingiski amwail peren ong KAUN-O, atail nanmwarki.

⁷A kumwail, sehd oh audepe kan koaros, kumwail pwungidekda; sampah oh towe kan koaros, kumwail kokoul!

⁸Kumwail pillap akan, kumwail lopwolopw; kumwail dohl akan, kumwail iang koul pereperen mwohn KAUN-O,

⁹pwehki e ketiket kodohng kaunda sampah. E pahn ketin kaunda tohn sampah ni mehlel oh pwuhng pahrek.