Read Pohnpeian Melkahka Kan 99 Bible Online

Melkahka Kan 99 - Pohnpeian bible

Melkahka Kan 99

¹KAUN-O iei nanmwarki, eri aramas akan kin rerrerki ar masak. E ket nan mwoale pohnangin kerup kan, sampah ahpw wie rerrerki.

²KAUN-O nan Saion me manaman; e ketin lapalap sang wehi koaruhsie.

³Aramas koaros pahn kin kapinga lapalap oh lingan en mware. Ih me sarawihe!

⁴Maing nanmwarki lapalap, komw kin ketin poakohng dahme pwung; komw ketin koasoanehdi mour en pwuhng nan wehin Israel; komw ketikidohr pwuhng oh pahrek.

⁵Kapinga KAUN-O atail Koht oh kaudok mwohn mwoale! Ih me Sarawihe!

⁶Moses oh Aaron iei sapwellime samworo, oh Samuel iei ih emen me kin kapakapohng; irail kin likweriong KAUN-O, e ahpw kin ketin sapeng irail.

⁷E ketin mahseniong irail sang nan uhren depweko; re kapwaiadahr kosonned oh koasoandi kan me e ketikihong irail.

⁸Maing KAUN, at Koht, komw ketin sapengehr sapwellimomwi aramas akan; komw ketin kasalehiong irail me komwi Koht emen me kin kupwurmahk, mehnda ma komw kin ketin kalokehkin irail diparail kan.

⁹Kapinga KAUN-O atail Koht oh kaudok pohn sapwellime dohl sarawio! KAUN-O atail Koht me sarawihe.