Read Pohnpeian Lepin Padahk Audapan Kan 1 Bible Online

Lepin Padahk Audapan Kan 1 - Pohnpeian bible

Lepin Padahk Audapan Kan 1

¹Lepin padahk audapan en Solomon, sapwellimen Depit pwutak oh pil nanmwarkien Israel.

²Iet akan lepin padahk audapan kan, me pahn sewesei kumwail, pwe kumwail en kasawihada dahkot loalokong oh peneu mwahu, oh pil wehwehki lepin mahsen loal akan.

³Lepin padahk pwukat kak padahkihong kumwail duwen amwail pahn momourki loalokong, oh duwen amwail pahn momourki inen, pwung, oh mwahu.

⁴Re kak kakoahiekihala me soakoahiek kan, oh padahkihong me pwulopwul kan duwen ar pahn kak kapwaiada pwukoa tohto.

⁵Lepin padahk pwukat pil kak kalaudehla loalokong en me loalokong kan, oh wia mehn kaweid ong me neksang sukuhl kan.

⁶Eri, re ahpw pahn kak wehwehkihla wehwe rir en lepin padahk kan, oh pil peidek apwal kan me aramas loalokong kan kin kapwarehda.

⁷Ma ke men loalokongla, ke uhdahn pahn lemmwiki Koht mwohn mehkoaros. Aramas soaloalokong kan sohte kin kesempwaliki loalokong, oh sohte men sukuhlki mehkot.

⁸Samwa, rong mahsen en omw pahpa, oh rong kanahieng padahk en omw nohno.

⁹Pwe ara padahk kan pahn kamwahwihala omw mour, rasehng mwomw mwahu en elin kapwat pohn mwoangomw de elin tuhke nin tepinweromw.

¹⁰Samwa, ni me suwed akan ar pahn kasongsongeiuk, dehr lohdiong.

¹¹Mweinele re pahn nda, “Nna, kitail rapahki emen oh kemehla. Kitail peiong aramas me soh-dipe kan, pwe en wia mehn kaperen ong kitail.

¹²Mehnda ma kitail pahn diar ar momour oh kehlail, a kitail kadarmourihrailla.

¹³Kitail pahn diarada dipwisou kaselel tohto, oh kadirehkihla imwatail kepwehn kuhl kan.

¹⁴Kohdo, iang kiht! Kitail ahpw pahn ahnekipene kepwe pirapada kan.”

¹⁵Eri, samwa, dehr werekiong soangen aramas pwukat, a kadohwaniraileweisang rehmw.

¹⁶Irail kin ngoangki wiahda me suwed. Ahnsou koaros re kin onohnop en kemehla aramas.

¹⁷Sohte katepen omw pahn kihpeseng uhk pwoat mwohn menpihr men me ke men koledi, ni eh kilikilengdohng uhk.

¹⁸A soangen aramas pwukat kin kaunopada lidip ehu ong pein irail. Re sohte pahn ehu ong pein irail. Re sohte pahn koledi mehkot, ihte pein mourirail.

¹⁹Tiahk en pirap kin pirapahla pein mouren sounpirapo-ih met me kin wiawihong irail me kin momourki pirap.

²⁰Kumwail rong! Loalokong kin likilikwer nanial kan oh nan wasahn netinet kan;

²¹e kin likilikwer laud nan wenihmwen kelen kahnimw kan, oh pil wasa koaros me aramas kin pokonpene ie:

²²“Kumwail aramas pweipwei kan! Ia erein amwail pahn men mihmi nan soangen mour wet? Ia werein amwail pahn kin mwamwahliki loalokong? Kumwail sohte pahn wehwehkihla?

²³Kumwail rong ei peneu kan; I ahpw pahn kihong kumwail kaweid mwahu oh pil ei loalokong.

²⁴I kin ekehker kumwail, I lukei kumwail en kohdo, a kumwail sohte men rong. Kumwail sohte mwahn tehk mwahu.

²⁵Kumwail kin sohpeisang ei peneu kan, oh sohte mwahn men I en kapwungohng kumwail.

²⁶Eri, ma kumwail pahn lelohng ni apwal, a I pahn kouruhrkin kumwail. Ni amwail masepwehk laud, I pil pahn kouruhrkin kumwail-%

²⁷ni mehn kamasepwehk kot eh pahn lelohng kumwail, me rasehng melimel ehu oh kisinieng en apwal me wadohng kumwail medek oh kansensuwed.

²⁸Ni ahnsowo kumwail pahn likweriong ie, a I sohte pahn sapeng. Kumwail pahn kakete raparapahkin ie wasa koaros, a kumwail sohte pahn diar ie.

²⁹Kumwail saikinte mwahn doadoahngki amwail loalokong, kumwail sohte kin men lemmwiki KAUN-O.

³⁰Kumwail sohte mwahn men alehda ei peneu, de kesempwaliki ei kapwung.

³¹Eri, kumwail uhdahn pahn ale mehkoaros me konehng kumwail, oh amwail wiewia kan pahn kansensuwedih kumwail.

³²Aramas soakoahiek kan kin mehkihla ar sohpeisang loalokong. Aramas pweipwei kan kin mwomwkihla ar sohte medemedewe mwahu.

³³A ma mehmen pahn rong ie, e pahn ale komour. E pahn poadoandoarla, oh sohte kahrepen eh pahn masak mehkot.”