Read Pohnpeian Lepin Padahk Audapan Kan 24 Bible Online

Lepin Padahk Audapan Kan 24 - Pohnpeian bible

Lepin Padahk Audapan Kan 24

¹Dehr peirinki aramas suwed kan, oh ke dehr song en kompoakepahnkin irail.

²Ihte me re kin medemedewe re en kapingada wasa; ahnsou koaros me re kin sarapeseng re kin kamedekehla emen.

³Ihmw kan kin kokouda pohn poahsoan me poahsoanki kupwurokong oh dehdehki.

⁴Wasa me loalokong kin mi ie, pere kan kin audaudkihda dipwisou kesempwal oh lingan.

⁵Omw loalokong mwahusang omw kehlail. Ei, loalokong me ienen kesempwalsang kehlail.

⁶Eri, kumwail uhdahn pahn wiahda koasoandi mwahu mwohn amwail pahn kowohng mahwen. Oh uwen tohtohn kaweid mwahu me kumwail kin alehdi, iei ih kasalepen amwail pahn kana nan mahwen.

⁷Mahsen en kupwurokong kan me nohn loal pwe me pweipwei kan en kak dehdehki. E sohte kak patohwanda mehkot ni ahnsou me mahsen en ire kesempwal akan kin wiawi.

⁸Ma ke pahn kin koasoakoasoane mehkot suwed ahnsou koaros, ke pahn ndandkihla me kowe sounkaping wasa.

⁹Soangen koasoandi koaros me aramas pweipwei men pahn medewehda pahn wia dihp ehu. Aramas kin kailongki mehmen me sohte eh mehkot ahpw kin mwamwahliki meteikan.

¹⁰Ma ke me luwet ni ahnsou apwal, ke me uhdahn lamalam luwet.

¹¹Dehr peikasalki doarehla emen me pahn kamakamala ni sapwung.

¹²Mweinele ke pahn nda me kaidehn omw pwukoa, ahpw Koht mwahngih oh kin ketin teneki nsenomw kan. E kin ketin mwasamwasahn uhk, oh mwahngih mehkoaros; oh e pahn ketin katingihekin uhk nin duwen me konehng omw wiewia kan.

¹³Samwa, tungoale sukehn loangalap; pwe mehkot mwahu ehu. Oh duwen sukehn loangalap eh mem nan eweomw,

¹⁴iei duwen kupwurokong eh mwahu ong ngenomw. Alehda kupwurokong oh omw mour en rahn kohkohdo pahn mwahu.

¹⁵Ke dehr duwehte aramas suwed me kin koasoanehdi en pirapa aramas lelepek men de adihasang imwe.

¹⁶Sohte katepen uwen tohtohn aramas lelepek men eh pahn pwupwudi, ahpw e kin pwurehng pwourda; ahpw kahpwal kin kamwomwala aramas suwed.

¹⁷Dehr perenki ma omw imwintihti kin lelohng apwal.

¹⁸KAUN-O pahn ketin mwahngih ma ke wia met, oh e sohte pahn kaloke omw imwintihtio.

¹⁹Dehr pwunodki aramas suwed akan; oh dehr peiriniong irail.

²⁰Sohte ahnsou mwahu ong aramas suwed emen ni ahnsou kohkohdo-sohte mehkot e pahn kak kasikasik.

²¹Lemmwiki KAUN-O, samwa, oh wauneki nanmwarki. Dehr patehng aramas akan me kin uhwong ira;

²²soangen aramas pwukat kakete ohla ni ahnsou mwadang. Ke ese soangen apwal laud me Koht de nanmwarki kak ketin wiahiong irail?

²³Aramas kupwurokong kan pil iang wia mahsen en kupwurokong pwukat: E sohte pwung sounkopwung men en uhpalihki ehute pali.

²⁴Ma pwunglahn kopwungo pahn kasalehda me aramas dipadahro me mwakelekel, e pahn riahla oh aramas koaros pahn kailongkihla.

²⁵Sounkopwung kan me pahn kaloke me dipadahr akan pahn paiamwahula oh pereperenki ar adamwahu.

²⁶Pasapeng mehlel iei kilel en kompoakepah mehlel.

²⁷Ke dehr kauwada imwomw oh koasoanehdi loale, ke lao kaunopada omw mwaht akan nan sapwomw, oh ke wehwehkier me ke kakehr mour sang loale.

²⁸Ke dehr wia kadehde en uhwong emen ni eh sohte kahrepe, de koasoia mehkot suwed duwen ih.

²⁹Ke dehr nda, “I pahn wiahiong dahme e wiahiong ie. I pahn dupukohng mehkoaros me e wiahiong ie!”

³⁰Rahn ehu I keidla nan sapwen aramas pohnkahke men oh nan eh mwetin wain ehu.

³¹Nan sahpwo me inenen dipwidipw mehlel oh diren dihpw tekatek. Kehl me kapilpene mwahto pil rengkdier.

³²I ahpw kilang oh medemedewe, oh diarada padahk ehu sang ni ire wet:

³³kanahngada omw meiren; kihpene pehmw pohn mwaremwaromw, kowe kommoaldi oh meirla mahs ekis ahnsou,

³⁴ahpw nindokon omw pahn memeir, semwehmwe pahn lel uhk rasehng sounpirap me wisik kesik.