Read Pohnpeian Lepin Padahk Audapan Kan 31 Bible Online

Lepin Padahk Audapan Kan 31 - Pohnpeian bible

Lepin Padahk Audapan Kan 31

¹Iet kan mahsen me inen Nanmwarki Lemuel kaweidki ih:

²“Kowe nei pwutak kompoake, pasapengpen ei kapakap akan. Dahme I pahn ndahwei?

³Ke dehr kauwehla mwahl omw kehl rehn lih akan oh kesehkihla mwahl noumw mwohni lih; pwe irail me kesedier nanmwarki kan.

⁴Rong, lao Lemuel. Nanmwarki kan sohte konehng re en konote wain de kamam sakau kehlail.

⁵Ni ar kin konote sakau, re kin meliehla kosonned akan oh pohnsehsehla pwungen aramas paisuwed kan.

⁶Sakau kehlail iei kenen aramas akan me pahn melahr, oh ong irail kan me pahtoulahr kowahlap.

⁷Irail en nim oh manokehla ar paisuwed oh pahtou.

⁸“Ke en mahsen ni mwaren irail kan me sohte kak lokaiahki pein irail. Apwalih pwungen aramas koaros me sohte kak diar sawasaparail.

⁹Mahsen ni mwararail oh wia sounkopwung pwung men. Apwalih pwungen me semwehmwe kan oh me anahne sawas akan.”

¹⁰Lih pwopwoud me keieu koahiek men, kesempwalsang takai kesempwal akan; ahpw ia duwen eh nohn apwal en diar emen me duwehte met.

¹¹Eh pwoud kin likih; eri, e sohte pahn semwehmwehla.

¹²Erein eh momour, lih menet kin wia mwahu ong eh pwoud, e sohte kin kansensuwedihada.

¹³Lih menet kin soupisengki en wiahda likou wunen sihpw oh pil likou linen.

¹⁴Lih menet kin wadohng nan imwe kisin mwenge sang wasa doh, rasehng sohp en netinet kan.

¹⁵E kin pirida nin sohrahn pwe en kaunopada kisin mwenge ong eh peneinei, oh padahkihong eh lidu kan dahme re en kin wia.

¹⁶E kin rapahkihda sahpw oh pwainda, oh kin wiahkihda mwetin wain mwohni me pein ih koadoahkihada.

¹⁷E kin kehlail, men wia doadoahk, oh paliwar kehlail.

¹⁸E kin wehwehki kesempwal en dipwisou kan me e kin wiahda, oh e pil kin wia eh doadoahk nipwong.

¹⁹E kin pein wiahda eh dereht oh dehkada eh likou.

²⁰E kin kisekise me semwehmwe kan oh me anahne sawas akan.

²¹E sohte kin nsenohki ahnsoun kopou, pwehki eh peneinei kin ahneki likou mosul.

²²E kin wiahda kidipen madres kan, oh likawihada likou linen me poh ntahnmwel lingan.

²³Eh pwoud ohl ndand men, iei ih emen me lapalap en kahnimwo.

²⁴E kin wiahda likou oh pirapir, oh netikihong sounnetinet kan.

²⁵E kin kehlail oh waun, e sohte kin masak dahme pahn wiawi mwuhr.

²⁶Eh lokaia me maledek oh kin diren loalokong.

²⁷Ahnsou koaros lih menet me soupisek, e kin mwasamwasahn anahn kan en eh peneinei.

²⁸Nah seri kan kin kasapalkalahnganohng, oh eh pwoud pil kin kapikapinga.

²⁹Pein ohlo ahpw kin nda, “Lih tohto me mwahu, a kowe me keieu mwahusang irail koaros.”

³⁰Poh komwokomw me widingan, oh lingan kin sohrala, ahpw lih emen me kin lemmwiki KAUN-O uhdahn pahn ndandla.

³¹Koaros en kapingkihong uwen me konehng ni eh wiewia kan. Me konehng lih menet en ndand mwahu mwohn mesen aramas akan koaros.