Read Pohnpeian Lepin Padahk Audapan Kan 4 Bible Online

Lepin Padahk Audapan Kan 4 - Pohnpeian bible

Lepin Padahk Audapan Kan 4

¹Samwa ko, kumwail rong dahme samamwail kan kin padahkihong kumwail. Kumwail rong kanahieng, kumwail ahpw pahn dehdehkihla.

²Dahme I padapadahkihong kumwail me mwahu, eri, kumwail tamataman padahk pwukat koaros.

³Ngehi iehros emen rehn pahpa oh nohno, eri, ni ei kekeirda,

⁴semeio kin padahkihong ie soahng kan. E kin nda, “Tamataman dahme I ndawei oh dehr manokehla. Kapwaiada me I ndaiong uhk, ke ahpw pahn mourkihla.

⁵Nantihong alehda kupwurokong oh erpit! Dehr manokehla de pohnsehse ei padahk kan.

⁶Ke dehr kesehla kupwurokong, pwe ih me pahn sinsileiuk; poakohng pwe e pahn kamouruhkala.

⁷Kupwurokong me keieu kesempwal ke en alehda. Mehkoaros likin met, pil nantihong alehda erpit.

⁸Poakohng kupwurokong, e ahpw pahn kahrehiong uhk omw pahn lapalapala. Pwoalehdi teng, e ahpw pahn kawauwihiukala.

⁹E pahn wiahla elin kapwat lingan ehu pohn moangomw.”

¹⁰Rong ie, samwa. Rong oh ale ei padahk kan ni mehlel, ke ahpw pahn mour werei.

¹¹I padahkihonguhkehr duwen kupwurokong oh ahl pwung en mour.

¹²Sohte mehkot pahn uh nan elomw ma ke pahn weweidwei ni loalokong, oh ke sohte pahn dipekelekel ni omw pahn tang.

¹³Tamataman ahnsou koaros dahme ke padahngkier. Padahk kan me ke aleier iei omw mour-sinsile mwahu.

¹⁴Ke dehr kohla wasa aramas suwed kan kin kohla ie. Dehr idawehn karasepen aramas suwed kan.

¹⁵Dehr wia! Sohpeisang me suwed! Soikala oh wenewohng nan elomw.

¹⁶Aramas suwed sohte kin kak meirla lao re wiahda me suwed. Re kin pepehd ma re sohte wiahiong emen me suwed.

¹⁷Tiahk suwed oh tiahk eikek rasehng kisin mwenge oh pihl rehrail.

¹⁸Ahl me aramas pwung kan kin weid loale rasehng dakadahn ketipin me kin maramarainla lao rahn pwarada.

¹⁹Ahl en me suwed kan me rotorot rasehng pwohng. Re kin pwupwudi, ahpw re sohte kin kilang dahme re dipekelekelki.

²⁰Samwa, rong kanahieng dahme I nda. Rong ei koasoi kan.

²¹Dehr mweidohng en dohsang uhk. Tamataman oh kolokol nan kapehdomw.

²²Padahk pwukat pahn kahrehda mour oh kakehlahda mehmen me wehwehki.

²³Kanahieng omw madamadau, pwe omw madamadau kan kin kahrehda mwomwen omw mour.

²⁴Dehr koasoia mehkot me sohte mehlel. Dehr kedirepwki lokaia likamw oh lokaia me kin kasalongehla aramas.

²⁵Sarada kilengwei ni likilik; dehr itiekidi ni namenek.

²⁶Koasoanehdi ni keneinei dahme ke pahn wia, oh mehkan me ke pahn wia ahpw pahn pweida mwahu.

²⁷Sohpeisang me suwed oh wenewei mwohmw. Dehr wia ehu kahk sang ni ahl pwung.