Read Pohnpeian Lepin Padahk Audapan Kan 5 Bible Online

Lepin Padahk Audapan Kan 5 - Pohnpeian bible

Lepin Padahk Audapan Kan 5

¹Samwa, tehk oh rong kanahieng ei kupwurokong oh erpit.

²Ke ahpw pahn esehla weweidki ei kaweid kan, oh omw koasoi kan pahn kasalehda me ke ahneki loalokong.

³Kilin ewen lih pwopwoud men pahn mem rasehng sukehn loangalap oh eh metik uhk pahn kansenamwahu rasehng lehn olip,

⁴ahpw ni imwilah sohte mehkot me e pahn kihong uhk, ihte nsensuwed oh medek.

⁵Liho pahn kahrehiukalahng nan wasahn me melahr akan; ahl me e kin weweid loale iei ahl en kolahng mehla.

⁶E sohte kin weid nan ahl en kolahng mour; ahpw e kin salongasang, oh e sohte kin wehwehki dahme wiewiawi.

⁷Eri, samwa ko, kumwail rong ie oh dehr manokehla dahme I ndinda.

⁸Kumwail keiweisang soangen lih menet! Dehr pil keilahng limwahn eh wenihmw!

⁹Pwe ma soh, meteikan me pahn uhd alehdi wahu me kumwail ahneki mahs, oh kumwail pahn kamakamala ni amwail pwulopwul nan pehn aramas me sehse mahk akan.

¹⁰Ei, mehn liki kan pahn kihsang amwail pai, oh mehkan me kumwail koadoahkihadahr pahn uhd kohieng emen tohrohr.

¹¹Kumwail pahn wonohn weiweirek nan dewemwail awiawih mehla, udukamwail pahn sosohrasang,

¹²oh kumwail ahpw pahn nda, “Dahme I sohte alehki padahk pwuko? Dahme I sohte mweidkihong emen en kapwungiehla?

¹³I sohte rong oh tehk arail padahk.

¹⁴I ahpw mwadangete diarada ei nameneklahr.”

¹⁵Loalopwoatohng omw pwoud oh kihong ih kelehpw omw limpoak.

¹⁶Seri kan me emen lih torohr pahn kaipwidiong uhk sohte pahn seweseiuk.

¹⁷Noumw seri kan me pahn laudla oh seweseiuk, ahpw kaidehn mehn liki kan.

¹⁸Eri, ke en pereperenki omw pwoud oh rapahki omw peren rehn serepein me ke pwoudiki-%

¹⁹me masamwahu oh kaselel rasehng tie men. Eh kaselel en kansenamwahwihiuk; en kapilkinuhkpene eh limpoak.

²⁰Samwa, dahme ke pahn kihongki emen lih tohrohr omw limpoak? Dahme ke anahnehki linganen en emen ohl eh pwoud?

²¹KAUN-O kin ketin mahsanih mehkoaros me ke kin wia. E kin ketin mwasamwasahn uhk wasa koaros me ke pahn kohla ie.

²²Dipen aramas suwed men iei lidip ehu. E kin lohdi nan lidip en dipe kan.

²³E kin mehla pwehki eh sohte kak katokihedi eh ineng. Eh pweipwei mwuledek pahn kahrehiong ih nan sousou.