Read Pohnpeian Lepin Padahk Audapan Kan 7 Bible Online

Lepin Padahk Audapan Kan 7 - Pohnpeian bible

Lepin Padahk Audapan Kan 7

¹Samwa, tamanda ei lokaia pwukat oh dehr manokehla me I padahkihonguhkehr.

²Kapwaiada ei lokaia kan, ke ahpw pahn mour werei. Kanahieng omw idawehn ei padahk kan, duwehte omw kin apwahpwalih pwoaren mesomw kan.

³Nekinekid ei padahk kan ahnsou koaros; ntingihediong nan mohngiongomwen.

⁴Wiahki kupwurokong riomw serepein, oh wiahki erpit kompoakepahmw me ke keieu poakohng.

⁵Ira pahn sileiukasang en ohl teikan ar pwoud kan, oh pil sang lih akan me kin kaweid sapwung aramas akan.

⁶Ehu ahnsowo I kilikilengieisang ni wenihmwtok en imwei,

⁷I ahpw kilangada mwahnakapw pwulopwul tohto me soakoahiek, oh diarada emen pwutak pweipwei.

⁸E alialu kohkohla pohn ahlo, limwahn wasa me lih emen kin kousoan ie. E kohkohla karanih imwen liho

⁹nin soutik, mwurin wasa eh pwongier.

¹⁰Eri, liho ahpw tuhwong pwutako. Liho mi nan likoun lihen netiki paliwere men, oh e wiewia eh koasoandi kan.

¹¹(Liho me kommwad oh sohte kin namenek; e kin alialuseli pohn ahl akan ahnsou koaros.

¹²E pahn kin kesikesihnen oh awiawih ni keimwen ahl sohte lipilipil. Ekei ahnsou e kin awiawih nan wasahn netinet kan.)

¹³Liho eri koledi pwutako oh metik, oh kangkakil nan mese, oh nda,

¹⁴“I wiahier ei meirong ko rahnwet, oh alehier uduk sang ni meirong ko.

¹⁵Ngehi eri kohdo raparapahkin uhk, pwe I men tuhwong uhk. Eri, iet kowe!

¹⁶I kidimkidahr ei peht tehi mweimwei linen kei sang Isip.

¹⁷I pil usupihkiher mehn kapwohmwahu mir, alos, oh sinamon.

¹⁸Kohdo kita pahn wia tiahk en limpoak pwonget pwon. Kita pahn pwoaloapwoal oh pereperen.

¹⁹Pwe ei pwoudo sohte mi ni imwato. E seiloaklahng wasa doh.

²⁰E pil wa kohla mwohni tohto; eri, e sohte pahn pwurodo mwurin wihk riau.”

²¹Liho eri kasongosongehki pwutako eh mwomw kadek. Pwutako eri lohdiong eh kadek koasoi.

²²Eri, pwutako ahpw mwadangete iang liho kohla, rasehng kou me kin kohwong kamakamala, pil rasehng tie men me kin tangalahng pwupwudiong nan lidip,

²³wasa arep en kesik ketieu pwoat pahn doakoapeseng eh mohngiong. Pwutako rasehng menpihr me pihrdohng nan uhk-e sohte mwahn ese me eh mour kohkolahng apwal.

²⁴Eri met, samwa ko, kumwail rong ie, rong kanahieng me I pahn nda.

²⁵Dehr mweidohng soangen lih duwehte met en kin kaunda nan mohngiongamwail; dehr idawehnseli soangen lih menet.

²⁶Ih me kin kauwehla mour mwahu en ohl tohto, e kin kahrehiong me tohtohie ar kin mehla.

²⁷Ma ke pahn kolahng ni imweo, ke pahn keidla nan ahl me kolahng nan wasahn me melahr akan, pwe iei ih ahl mwotomwot ong mehla.