Read Pohnpeian Lepin Padahk Audapan Kan 8 Bible Online

Lepin Padahk Audapan Kan 8 - Pohnpeian bible

Lepin Padahk Audapan Kan 8

¹Kumwail rong! Ahnsou wet kupwurokong likilikwer. Lamalam mwahu lelongehr salengen aramas akan.

²Kupwurokong kesikesihnen pohn kumwen dohl akan limwahn ahl, oh pil wasa me ahl akan kin tuhpene ie.

³E kin likilikwer ndinda nan wasahn pedolong nan kahnimwo, oh pil limwahn wenihmwen kehl kan:

⁴“I peki kumwail, aramas akan, I likweriong aramas akan koaros nin sampah.

⁵Kumwail saikinte koahiekla? Eri, kumwail nantihong en koahiekla, duwehte ohl mehlel kan. Kumwail pil pweipwei? Eri, kumwail nantihong pwe en mie amwail lamalam.

⁶Rong ei koasoi kaselel kan, pwe mehkoaros me I kin ndawei me pwung.

⁷Me I kin nda, iei ih me mehlel; pwe I kin suwediki lokaia likamw.

⁸Mehkoaros me I kin nda, iei me mehlel; sohte likamw de kaweid sapwung.

⁹E kin sansalohng aramas emen me kin ahneki erpit, oh pil me wehwehkilahr akan.

¹⁰Eri, pilada ei padahk kan, a kaidehn silper; pilada loalokong, a kaidehn kohl me keieu kaselel.

¹¹“Ngehi Kupwurokong, I mwahusang takai kesempwal akan; sohte mehkot kumwail kin anahne me kak pahrekiong ie.

¹²Ngehi Kupwurokong, oh mie erpit rehi, pil mie ei loalokong oh mehn madamadau mwahu.

¹³Wauneki KAUN-O iei kailongki me suwed. I kin kailongki pohnmwahso oh aklapalap, pil tiahk suwed oh lokaia likamw.

¹⁴I kin wiahda koasoandi kan oh kapwaiada, I kin dehdehki, oh I me kehlail.

¹⁵Mie ei sawas ong nanmwarki kan ni ar kaunda wasa, oh I kin sewese kaun akan ni ar kin wiahda kosonned mwahu kan.

¹⁶Irail koaros me kin kaunda wasa nan sampah kin ale ei sawas, kaun akan oh pil soupeidi kan.

¹⁷I kin poakepoake irail akan me kin poakohng ie; mehmen me pahn rapahkin ie pahn kak diariehda.

¹⁸Mie ei dipwisou kesempwal oh wahu me I kak kisakiskiwei, oh pil ei kepwehpwe oh paiamwahu.

¹⁹Me kumwail kak ale sang ie, iei ih me mwahusang kohl me keieu kaselel, oh pil mwahusang silper me keieu mwakelekel.

²⁰I kin alu nan elen pwung, I kin idawehn nan elen pwuhng.

²¹I kin kihong irail me poakohng ie kan arail kepwehpwe, oh I kin kadirehkihla imwarail kan dipwisou kesempwal.

²²“KAUN-O ketin kapikiehda mwohn mehkoaros, iei keieun sapwellime doadoahk mahsie.

²³I kapikpikdahr ni tepin kawa, nin tapio, mwohn sampah wet eh saikinte mie.

²⁴I ipwidier mwohn sehd eh saikinte mie, ni ahnsou me utuhnpihl kan saikinte pwarada.

²⁵I ipwidier mwohn nahna kan, mwohn dohl akan ar koasoandiong nan dewehr,

²⁶mwohn Koht eh ketin kapikada sampah oh mohs akan, mwohn keieun pwehl me e ketin wiahda.

²⁷I mieier ni ahnsou me e ketikihong lahng powe, ni ahnsou me e ketin kapahwei lime pohn sehdo,

²⁸ni eh ketikihong depwek kan nan wehwe, ni eh ketin ritingada utuhnpihl en nansed

²⁹oh mahsanihong pilen nansed en kohda ahpw sohte ileile sang me e ketin kupwurki. I mihmi wasao ni ahnsou me e ketin koasoanehdi poahsoan en sampah.

³⁰I mi limwah, duwehte sounsawas emen, iei ngehi me kin kapakaparanih rahn koaros, oh I pil perenkihda ei patopato reh-%

³¹I perenkihda sampah, oh I pil perenkihda aramas akan koaros.

³²“Eri, mwahnakapw akan, kumwail rong ie. Kapwaiada ei lokaia kan, kumwail ahpw pahn perenkihda.

³³Rong kanahieng omw sounpadahk. Ke en loalokongla; dehr mwamwahlikihla.

³⁴Mehmen me kin rong ie pahn perenda, me kin mihmi limwahn ei wenihmw rahn koaros, awiawih ie ni wenihmwen pedolong ni imwei.

³⁵Mehmen me diariehda, e diarada mour, oh KAUN-O pahn kupwurperenki.

³⁶Mehmen me sohte diariehda, e kin pein kauwehla pein ih, pwe mehmen me kin kailongkin ie kin poakohng mehla.”