Read Pohnpeian Melkahkahn Melkahka Kan 2 Bible Online

Melkahkahn Melkahka Kan 2 - Pohnpeian bible

Melkahkahn Melkahka Kan 2

¹Ihte I wia kisin wahnrohs en nansapw en Saron, kiepw pwoat nan wahu. Ohlo

²Rasehng kiepw ehu nanpwungen dihpw tekatek kan, iei duwen ei mwohnlimpoak nanpwungen lih akan. Liho

³Rasehng tuhke apel pwoat nanpwungen tuhke kan en nanwel, iei duwen ei karasahiong ei mwohnlimpoak ong ohl teikan. I kin perenki mwomwohd pahn mweteh, oh wah kan me inenen mem nan ewei.

⁴E waielahng nan eh perehn kamadipw oh apihada pohi pilaik en limpoak.

⁵Pwurehng kakehlakahkiniehda wahn wain madekeng kan oh katinahkiniehda apel kan! Pwe I luwetkihla ei limlimpoak.

⁶Peh palimeing mihmi pahn moangei, oh peh palimaun kin damwedamwer ie.

⁷Lihen Serusalem kan, kumwail inoukihong ie, kumwail kahukihla ni mwaren tie marahra kan oh kasel kan me kumwail sohte pahn kedirapwahla at limpoak. Liho

⁸I rong ngilen ei mwohnlimpoak. E tangatang kohdo pohn nahna kan, tangatang kodohng ie pohn kisin dohl kan.

⁹Ei mwohnlimpoak rasehng kasel men, rasehng tie wol pwulopwul men. E kesikesihnen limwahn kehlo. E kilikilengdo nan wenihmwtoko, e mwasamwasahn ie ni didwehweho.

¹⁰Ei mwohnlimpoak koasoiong ie. Ohlo Nna, keido ei mwohnlimpoak; ei mwohnlimpoak, kohdo iang ie.

¹¹Ahnsoun kopou imwiseklahr; keteu tokedier;

¹²wahnrohs kan masalpesengier nansapw akan. Met iei ahnsoun kokoul, ngilen mwuroi kin peipeido sang nan mwaht akan.

¹³Wahntuhke pik kan tepidahr mat; nan wehwe direkilahr pwohtik pwohmwahu en masal en wain akan. Nna, keido ei mwohnlimpoak; ei mwohnlimpoak, kohdo iang ie.

¹⁴Ke rasehng mwuroi men me kin rukuruk nan pwoaren paip. Mweidohng ie I en kilang kaselel en mesomwen oh rong ngilamwahu en ngilomwen.

¹⁵Kumwail saikedi kidi en wel kan, kisin kidi en wel kan, mwohn ar pahn kauwehla at mwetin waino ni eh pahn masalpeseng. Liho

¹⁶Ei mwohnlimpoak iei ahi, oh ngehi me ah. E kin kamwenge nah pelin sihpw kan nanpwungen kiepw kan

¹⁷lao lel engitik en nimenseng eh kin ipido oh rotorot kin sohrala. Pwurodo, ei mwohnlimpoak, rasehng kasel men, rasehng tie wol en nanwel pohn nahna kan en Peder.