Read Pohnpeian Melkahkahn Melkahka Kan 4 Bible Online

Melkahkahn Melkahka Kan 4 - Pohnpeian bible

Melkahkahn Melkahka Kan 4

¹Soangen omw kaselel, ei mwohnlimpoak! Ia uwen poaren mesomw kan eh wie lingalingki limpoak pahn omw koaduhpwel. Pitenmoangomw rasehng pelin kuht me kin wie lusulus kohdi pohn kisin dohl kan en Kilead.

²Ngihmw kan pwetepwet rasehng sihpw kan me ahpwtehn seisei oh wideud. Sohte mehpwoat me kohsang; koaros pahrek mwahu.

³Kilinewomwen rasehng silik weitahta; ia uwen kaselel ni omw kin koasoi. Likin sepomw kan pwukapwuk pahn omw koaduhpwel.

⁴Tepinweromw pwonopwon oh mendendel rasehng sapwellimen Depit imwen douliko, oh omw elin kapwat ni tepinweromw rasehng mehn sansar kid.

⁵Omw dihdi kan rasehng kasel kan, mpweren tie me mwengemwengeseli nanpwungen kiepw kan.

⁶I pahn mihmi pohn kisin dohl en mir, pohn dohl en warpwohmwahu, lao engitik en nimenseng ipido oh rotorot sohrala.

⁷Soangen omw masamwahu, ei mwohnlimpoak; ia uwen omw kaselel!

⁸Nna, ei lih kamwohd, kita mweselsang pohn Nahna Lepanon kan; kita kohkohlahsang Lepanon. Kita kohdihla sang pohn kumwen Nahna Amana, sang pohn Nahna Senir oh Nahna Ermon, wasa me laion oh lepard kan kin koukousoan ie.

⁹Nan mesomwen, ei mwohnlimpoak oh ei lih kamwohd, oh mwaromw elin kapwat en pahn tepinweromwen kauwelahr mohngiongi.

¹⁰Omw limpoak kin kaperenihiehda, ei mwohnlimpoak, oh ei lih kamwohd. Omw limpoak iou sang wain; omw leh pwohtik pwohmwahu sang soangen mehn doal leh koaros.

¹¹Ei mwohnlimpoak, nemen kilin ewomwen rasehng mem en sukehn loangalap; lowomwen iei milik oh sukehn loangalap nan eweiet. Omw likou kan duwehte pwohtik pwohmwahu koaros en Lepanon.

¹²Ei mwohnlimpoak, ei lih kamwohd, iei mwaht rir ehu, mwetuwel ehu me kelpene, pwarer ehu me rir sang aramas koaros;

¹³iei wasa me kisin tuhke kan kin pweida mwahu ie. Re kin keirda rasehng soangen tuhke me kin adaneki pwohmakraneid oh wah me keieu kaselel. duwehte henna oh nard,

¹⁴sapron, kalamus, oh sinamon, de soangen warpwohmwahu koaros kin ohla mwahl wasao. Mir oh aloes kin keirda wasao iangahki soangen leh keieu pwohmwahu koaros.

¹⁵Pwarer kei kin kalamwurih mwetuwelo, pwilipwil en pihl sang ni piletik kan me kin pwilipwildihdo sang pohn Nahnahn Lepanon kan. Liho

¹⁶Pirida, kisinieng en Paliepeng. Kisinieng en Palieir, ipido nan ei mwahtet; kadirehkihla pwohtik pwohmwahu nan wehwe. Mweidohng ei mwohnlimpoak en mwemweit nan eh mwetuwel oh en konote wah me keieu kaselel.