Read Pohnpeian Melkahkahn Melkahka Kan 6 Bible Online

Melkahkahn Melkahka Kan 6 - Pohnpeian bible

Melkahkahn Melkahka Kan 6

¹Kowe, lih keieu kaselel nanpwungen lih akan koaros, ia wasa me omw mohnlimpoako kohla ie? Ndahdo mahs, mehnia ahl me e keidla ie, pwe se en seweseiuk iang rapahki. Liho

²Ei mwohnlimpoako samwalahr nan eh mwetuwelo, wasa me tuhke palsam kan kin keirda ie. E kamwekamwenge nah pelin sihpw kan nan mwetuwelo oh dandar kiepw kan.

³Ei mwohnlimpoako iei ahi, oh ngehi me ah; e kin kamwenge nah sihpw kan nanpwungen kiepw akan. Ohlo

⁴Ei mwohnlimpoak, ke inenen masamwahu rasehng Tirsa, kaselel rasehng kahnimw en Serusalem. oh mehn kapeudiahl lingan rasehng kahnimw laud pwukat.

⁵Sohpeiweisang ie, pwe pwoaren mesomw kan kaloweiedier. Pitenmoangomw kan rasehng pelin kuht me lusulus kohdi pohn kisin dohl akan en Kilead.

⁶Ngihmw kan pwetepwet rasehng pelin sihpw ehu me ahpwtehn wideud. Sohte apwoat me kohsang; koaros me pahrek.

⁷Likinsepomw kan pwukupwuk pahn omw koaduhpwel.

⁸Nanmwarkio en sapwellimaniki likend wenehk, pekehi weliakan, peinakapw tohto me soh kak wadawad!

⁹Ahpw mehtemen me I poakepoake, oh eh kaselel rasehng lingan en mwuroi men. Ih iehros emen rehn eh nohno, seri soisoi rehn eh nohno. Lih koaros kin kilang oh kapinga; lih nanmwarki kan oh pekehi kan kin wia arail koulen kapinga ih.

¹⁰Ihs memenet me mese rasehng lingen ketipin? E inenen masamwahu oh kaselel, rasehng ketipin de maram.

¹¹I kohdihla nan mwetuwel en almond kan pwe I en kilang kisin tuhke pwulopwul kan nan wahwo, pwe I en kilang tehntuhkehn wain me ahpwtehn pwerla kan oh tuhke pwohmakraneid me masalehr kan.

¹²I wie rerrer, pwehki omw kahrehiong ie I en tihwohkihla limpoak rasehng soundak werennansapw en mahwen eh kin ngoangkihla mahwen. Lihen Serusalem kan

¹³Pwurodo, pwurodo, kowe serepein en Sulam, pwe se en kilikilang omw kahlek. Liho Dahme kumwail men kilang kin ie ni ei kin kahkahlek nanpwungen sounpoudiahl akan?