Read Pohnpeian Melkahkahn Melkahka Kan 7 Bible Online

Melkahkahn Melkahka Kan 7 - Pohnpeian bible

Melkahkahn Melkahka Kan 7

¹Ia uwen kaselel en serepein men kowehn! Ia uwen kaselel en nehmw kan nan omw sandel kan. Kaselel en tepindengomw kan likamwete mengin pehn sounmahlen koahiek emen.

²Mie pwohl ehu wasao, me wain pwohmwahu sohte kin nekisang loale. Kapakap en wiht ehu mie wasao, me kiepw kan kapilpene.

³Omw dihdi kan rasehng mpwer en tie ehu, rasehng kasel riemen.

⁴Tepinweromw rasehng wasahn doulik aipori ehu. Pwoaren mesomw kan rasehng pwarer kan nan kahnimw Espon, limwahn wenihmwen kelen kahnimw lapalapo. Tumwomwen me inenen kaselel rasehng wasahn doulik en Lepanon me uh sallahng Damaskus.

⁵Moangomwen inenda rasehng Nahna Karmel. Lingan en omw ingihngen piripir rasehng silik me keieu kaselel; me lingene kakete kalowehdi kupwur en nanmwarki men.

⁶Ia uwen omw kaselel; ia uwen unseklahn kaperen en omw limpoak!

⁷Mwekid en paliweromw inenen kaselel rasehng nih pwoat, omw dihdi kan rasehng dunen nih tik.

⁸I pahn douda nan niho oh dolung wah kan. Omw dihdi kan rasehng dunen kreip ong ie, omw esingek rasehng pwohtik pwohmwahu en apel,

⁹oh ewomw rasehng wain me keieu iou. Liho Eri, waino en pwiliwohng rehn ei mwohnlimpoak, pwilipwilwei pohn kilin ewe oh ngih kan.

¹⁰Ei mwohnlimpoako kin ahnekin ie, oh kin inangih ie.

¹¹Kohdo ei mwohnlimpoak, kita kohdahla mahs nansapwo oh pweidi nan kisin kahnimw tikitik kan.

¹²Kita pahn sangkenei pirida nimenseng oh kilang mwetin wain kan pwe kita en kilang ma re keirdahr, ma re masalehr, ma tuhke pwohmakraneid ko masalehr. I ahpw pahn kihong uhk ei limpoak wasao.

¹³Ke pahn kak ned pwohtik pwohmwahu en wahntuhke mandreik kan, oh wahntuhke pwohmwahu koaros mie limwahn ata wenihmwo. Kompoakepahi, I nekinekid ong uhk soahng kaperen kan en mahs oh me kapw.