Read Pohnpeian Aiseia 12 Bible Online

Aiseia 12 - Pohnpeian bible

Aiseia 12

¹Rahn ehu pahn kohdo me aramas akan pahn koulki koul pwoatet, “I kapinga komwi, Maing KAUN! Komwi ketin engieng pahi, ahpw met komwi ketin kansenamwahwihiehla oh solahr ketin engieng.

²Koht me ei sounkomour; I pahn liki oh sohte masak mehkot. KAUN-O me ketikihdo ei manaman oh ei kehl; iei ih me ei sounkomour.

³Duwen pihl lemwulemwur eh kin kansenamwahwih me men nimpildahr, iei duwen sapwellimen Koht aramas akan ar pahn perenda ni eh pahn ketin komourirailla.”

⁴Rahn ehu pahn kohdo me aramas akan pahn koulki koul pwoatet, “Kumwail kapingkalahngan ong KAUN-O! Kumwail likwerih pwehn ketin sewesei kumwail! Kumwail lohkiong wehi koaros wiepen nin lime kan! Kumwail lohkiong irail uwen sapwellime roson!

⁵Kumwail kouliong KAUN-O pwehki wiepen nin lime lapalap akan. Sampah pwon en rong rohng pwukat.

⁶Koaros me kin kousoan nan Saion en ngisingis oh kokoul! Koht sarawien Israel me manaman, oh e kin ketin ieiang sapwellime aramas akan.”