Read Pohnpeian Aiseia 20 Bible Online

Aiseia 20 - Pohnpeian bible

Aiseia 20

¹Sarkon, nanmwarki lapalap en Asiria, ahpw kadarala kaun lapalap en karis en Asiria pwe en mahweniong kahnimw Asdod nan Pilisdia.

²Sounpar siluh mwowe KAUN-O ketin mahsanihongehr Aiseia, nein Eimwos en kapwuhrasang eh suht kan oh likoun nsensuwed me e likilikawih. E ahpw kapwaiada oh alialuseli kilisou oh sohte suht.

³Ni ahnsou me Asdod lohdi, KAUN-O ahpw ketin mahsanih, “Nei ladu Aiseia kohkohseli kilisou oh sohte suht erein sounpar siluh. Met iei kilel ehu en dahme pahn pweida ong Isip oh Sudan.

⁴Kaun lapalap en Asiria pahn ketikihla me selidi kan me e kalowehdi sang nan wehi riau pwukat, re pahn kilisou oh sohte suht. Me pwulopwul oh mah, re pahn alialu kohwei kilisou oh sohte suht, kawarail kan pahn sansalada, kahrehiong mehn Isip ar pahn namenekla.

⁵Irail ko me koapworopworkihla Sudan oh suweiki duwen Isip pahn lesila, e pahn sohla arail koapworopwor.

⁶Ni ahnsowo eh pahn leledo, aramas akan me kin kousoan ni oaroahr kan en Pilisdia pahn nda, ‘Kilang duwen aramas akan me kitail koapworopworki pwe re en doandoarei kitail sang nanmwarkien Asiria! Ia duwen atail pahn kak pitla?’ ”