Read Pohnpeian Aiseia 25 Bible Online

Aiseia 25 - Pohnpeian bible

Aiseia 25

¹Maing KAUN, komwi me ei Koht; I pahn waunekin komwi oh kapinga mwaromwi. Komwi ketin wiadahr soahng kapwuriamwei kei; komwi ketin kapwaiada ni loalopwoat koasoandi kan me komwi ketin wiadahr kawao.

²Komwi ketin wekidohng kahnimw kan ong ni mohn ihmw oh ketin kamwomwala arail kehl kehlail kan. Tehnpas akan me at imwintihti kan kauwadahr sohralahr kohkohlahte.

³Tohn kahnimw kehlail kan pahn kapinga komwi; kahnimw en wehi lemei kan pahn masak komwi.

⁴Me semwehmwe oh sohte sawasaparail kan pahn patolahng pahn kupwuromwi oh diar onepek mwahu ni ahnsou apwal. Komwi kin ketin pere irail sang melimel oh karakar en ketipin. Aramas lemei kan kin leledo rasehng melimel ni ahnsoun kopou,

⁵rasehng karakar nan sahpw madekeng ehu. Ahpw, Maing KAUN, komwi me ketin katokihedi ewen at imwintihti kan; komwi kin ketin katokihedi weriwer en aramas lemei kan, rasehng pelien depwek pali eh kin kalamwurih rahn kakarakar.

⁶Wasaht pohn Nahna Saion KAUN-O, Wasa Lapalap pahn ketin kaunopada kamadipw ehu ong wehi koaros nin sampah-kamadipw ehu me pahn direkihla kisin sak keieu kaselel oh wain keieu iou.

⁷Iei wasaht me e pahn mwadangete ketikihsang depwek en pahtou me mihmi pohn wehi koaros.

⁸KAUN-O, Wasa Lapalahpie pahn ketin kamwomwala mehla kohkohlahte! E pahn ketikihsang pilenmesen aramas koaros oh ketikihsang kanamenek me sapwellime aramas akan wie lokolongkier wasa koaros nin sampah. Pein KAUN-O me mahmahsen.

⁹Ahnsou me mepwukat pahn pweida, aramas koaros pahn nda, “Iei ih me at Koht! Kitail koapworopworkilahr ih, oh e ketin kapitkitaillahr. Iei ih me KAUN-O! Kitail koapworopworkilahr ih, oh met kitail nsenamwahulahr oh pereperen pwehki eh ketin doareikitaillahr.”

¹⁰KAUN-O pahn ketin sinsile Nahna Saion, ahpw mehn Mohap pahn tiatihdi rasehng dihpw meng eh kin tiatihdi nan pwise.

¹¹Re pahn kapahwei pehrail kan duwehte ar wie songosong en pampap, ahpw Koht pahn ketin kasaroweiraildi, oh pehrail kan pahn mwoatoredi.

¹²E pahn ketin kauwehla kelen mahwen en Mohap iangahki arail kehl ile kan oh kesepwekeiraildiong nan pwelpar.