Read Pohnpeian Aiseia 35 Bible Online

Aiseia 35 - Pohnpeian bible

Aiseia 35

¹Sapwtehn pahn perenda, oh rohs akan pahn mpwek oh masalpeseng nan sahpw madekeng kan.

²Sapwtehn pahn kokoul oh ngisingiski eh peren; e pahn linganla duwehte lingan en Nahna Lepanon kan, oh pwelmwahula duwehte mwaht akan en Karmel oh Saron. Aramas koaruhsie ahpw pahn udiahl lingan en Koht, re pahn kilang sapwellime roson oh manaman lapalahpie.

³Kumwail kakehlahda pehrail kan me ngiralahr, oh nehrail kan me rerrerki ar luwet.

⁴Kumwail ndaiong koaros me nan kapehd tikitiklahr, “Kumwail kehlail oh dehr masak! Koht pahn ketidohn kapitkumwailla, e pahn ketidohn kaloke amwail imwintihti kan.”

⁵Iei ahnsowo me maskun kan pahn pehdpeseng, oh me salengepon kan pahn rongada wasa.

⁶Me nehtuk kan pahn mwusikekda oh kahkahlek, oh me lohteng kan pahn ngisingiski ar peren. Pihl pahn kuspekda oh pwiliwei nan sapwtehn;

⁷wasahn pihk karakar akan pahn wiahla lehn pihl, oh sahpw madekeng kan pahn audaudkihda pwarer en pihl. Wasa me daiker kan kin kousoan ie, dihpw oh ahlek pahn uhd wosada ie.

⁸Allap pwoat pahn mihla wasao, me pahn adaneki “Ahl Sarawien Komour.” Sohte aramas dipan emen pahn keid ie; sohte aramas pweipwei men pahn kaweidsuwdihala irail kan me pahn kekeid ie.

⁹Sohte laion emen pahn kousoan wasao; sohte mahn kommwad emen pahn kin kakahnseli wasao. Irail kan me KAUN-O ketin kapitalahr, iei irail me pahn kin keid ni ahl pwoatet.

¹⁰Re pahn lellahng Serusalem pereperen, kokoul oh ngisingiski ar peren. Re pahn kin nsenamwahu kohkohlahte, saledek poatopoat sang nsensuwed oh pahtou.