Read Pohnpeian Aiseia 38 Bible Online

Aiseia 38 - Pohnpeian bible

Aiseia 38

¹Ni ahnsowo Nanmwarki Esekaia ketin luhmwuhmwda oh kereniong sipalla. Soukohp Aiseia, nein Eimwos, ahpw patohla pwe en tuhwong oh patohwanohng, “KAUN-O mahsanihong komwi en ketin koasoanehdi mehkoaros pwehki komwi sohte pahn pwurehng mwahula. Komwi onopada pwe komwi pahn sipalla.”

²Esekaia eri sohpeila nin dihdo oh loulou, mahsanih,

³“Maing KAUN, komw ketin tamataman me I kin papah komwi ni loalopwoat oh nan kapehd mehlel, oh I kin songosong ahnsou koaros en kapwaiada kupwuromwi.” E ahpw tentenihr kowahlap.

⁴KAUN-O eri mahsanihong Aiseia

⁵en pwurala rehn Esekaia oh patohwanohng, “Ngehi, KAUN-O, Koht en omw pahpa kahlap Depit, karongehier omw kapakap oh mahsaniher pilenmesomw; I pahn karairaila omw mour erein sounpar eisek limau.

⁶I pahn doarehla kowe oh kahnimw en Serusalem sang nanmwarki lapalap en Asiria, oh I pahn usehla sinsile kahnimwo.”

⁷Aiseia ahpw sapengki, “KAUN-O pahn ketikihdo ehu kilel me pahn kasalehda me e pahn ketin kapwaiada sapwellime inou.

⁸Ni kehndake me Nanmwarki Ahas ketin wiahda, KAUN-O pahn ketin kupwurehda pwe mweteo en pwurala mwuri ni kahk eisek.” Mweteo eri pwurala mwuri ni kahk eisek.

⁹Mwurin Esekaia eh rosonda sang sapwellime luhmwuhmwo, e ahpw ketin ntingihada koulen kaping pwoatet:

¹⁰Ni ahnsou kaperen en ei mour I kihkihong me I kohkolahng nan wasahn me melahr akan, solahr momourki mour en samaph wet.

¹¹I kihkihong me nan sapwen me momour kan I solahr pahn pwurehng udiahl KAUN-O de aramas mour men.

¹²Ei mour imwiseklahr, rasehng impwal ehu me kamweremwerdier, rasehng pelien likou ehu me sisetpesengier. I kihkihong me Koht me ketin katokedier mouri.

¹³Pwohng ehu pwon I kin sengisengki ei medek, rasehng ma laion emen tehrpesengier tih kat. I kihkihong me Koht me ketin katokedier mouri.

¹⁴Ngileiet tikitikla oh luwetala, ngilen pahtou rasehng ngilen mwuroi. Pwoaren mesei kat tihwohla kilikilengwohng nanleng. Maing KAUN, komwi ketin kapitiehsang kahpwal pwukat koaros.

¹⁵Dahme I kak patohwan? KAUN-O me ketin wiahda mepwukat. Mohngiongiet ohlahr, oh I solahr kak meir.

¹⁶Maing Kaun, I pahn momourkin komwi, komwihte me ei mour; komwi ketin kamwahwihiehla oh mweidohng I en momour.

¹⁷Ei nsensuwed pahn wekideklahng ni popohl. Komwi ketin doarelahr ei mour sang me keper koaros; komwi ketin kupwur mahkikihong ie dipei kan koaros.

¹⁸Sohte emen nan wasahn me melahr akan kak en kapinga komwi; me melahr akan sohte kak koapworopworki sapwellimomwi loalopwoat.

¹⁹Iei me momour kan me kin kapinga komwi, nin duwen ei kapinga komwi met. Sahm akan kin padahkihong neirail kan duwen omwi loalopwoat.

²⁰Maing KAUN, komwi ketin kamwahwihielahr. Se pahn kesengki arp kan oh koulki koulen kapinga komwi, Se pahn kapinga komwi nan Tehnpas Sarawio erein at mour.

²¹Aiseia eri patohwanohng nanmwarkio en ketikihong ni eh mpwos ko wahn pik me pitakatak, e ahpw pahn mwahula.

²²Nanmwarki Esekaia ahpw keinemwe, “Ia kilel me pahn kasalehda me I pahn kak kolahng ni Tehnpas Sarawio?”