Read Pohnpeian Aiseia 42 Bible Online

Aiseia 42 - Pohnpeian bible

Aiseia 42

¹KAUN-O ketin mahsanih, “Iet ei laduwo me I kakehlahda- me I piladahr oh kin kupwurperenki. I audehkidahr ngeni, oh e pahn ketikihong wehi koaros pwuhng pahrek.

²E sohte pahn ketin weriwer de mahsen ni ngihl laud, de kapahrek ni ngihl laud nanial akan.

³E sohte pahn ketin katipwasang ahlek pwoat me raukdier, de kakunla lamp ehu me pahn kunlahr. E pahn ketikihong koaros pwuhng poatopoat.

⁴E sohte pahn kesehla eh koapworopwor, de nan kapehd tikitikla, ahpw e pahn kauwada tiahk pwung nin sampah. Sahpw doh kan kin kasikasik sapwellime padahk kan.”

⁵Koht ketin kapikada nanleng oh ketin audehla pahnlahng, e ketin wiahda sampah oh soahng momour kan koaros; e ketikihong mour oh ngehn ong aramas kan koaros. Eri, KAUN-O Koht, ketin mahsanihong sapwellime ladu,

⁶“Ngehi, KAUN-O, I malipeiukodohr oh ketikihonguhkehr manaman pwe ke en kin tetehk pwuhng pwe en mie nin sampah. Pwehki kowe, I pahn wiahda inou ong aramas koaros; pwehki kowe, I pahn ketikihong marain wehi koaros.

⁷Ke pahn kapehdpeseng me maskun kan, oh kasaledekihala me kin wonohn nan rotorot en imweteng kan.

⁸“Ngehite me KAUN-O, omw Koht. Sohte emen koht pahn ahneki lingan en mwarei; I sohte pahn mweidohng koht likamw akan en iang ale kapingpei.

⁹Mehkan me I kohpadahr, re pweidahr ahnsou wet. Met I pahn kasalehiong uhk irair kapw kei, mwohn ar pahn tepida wiawi.”

¹⁰Kumwail koulkihong KAUN-O apwoat koul kapwen, kumwail tohn sampah koaros, kumwail koul kapikapinga ih! Kumwail kan me seiseiloak nan madau kan, kumwail kapinga KAUN-O; soahng mour kan koaros nan madau kan, kumwail kapinga KAUN-O! Kumwail sahpw doh kan, oh towe kan koaros, kumwail koul!

¹¹Sapwtehn oh kahnimw kan ie en kapinga Koht; mehn Kedar kan en pil iang kapinga ih! Tohn kahnimw Sela en ngisingiski ar peren oh ngihl laud kokoul sang pohn kumwen nahna kan.

¹²Irail kan me kin kousoan nin sahpw doh kan, re en koul kapikapinga KAUN-O!

¹³KAUN-O kin ketido pwehn mahwen rasehng sounpei men; e ketin onopadahr oh kupwur ngoangkilahr en mahwen. Ruwesen mahwen ngiringirisek sang nan doauese, e ketin kasalehda sapwellime manaman ong sapwellime imwintihti kan.

¹⁴Koht ketin mahsanih, “I nennenlahr ahnsou reirei; I sohte kin sapeng pekipek en nei aramas akan. Ahpw met e lelehr ahnsoun ei pahn mwekid; I ahpw ngihl laudida duwehte lih emen me medek en neitik lelehr.

¹⁵I pahn kauwehla dohl oh nahna kan, oh I pahn karongehla dihpw oh tuhke kan. I pahn wiahkihla pillap akan sapwtehn, oh kamadahda leh kan.

¹⁶“I pahn kahluwa nei aramas me maskun kan nan ahl akan me re sohte mwahn kin keid ie. I pahn kamarainihada rotorot me re mihmi loale, oh kainenehla ahl pirek kan me mi mwohrail. Iei mepwukat me I inoukidahr, oh I pahn kapwaiada ni soh peikasal.

¹⁷Irail kan me kin koapworopworki dikedik en eni kan, oh kin wiahkin irail arail koht; re pahn sarohdi oh namenekla.”

¹⁸KAUN-O ketin mahsanih, “Kumwail me salengepon kan, kumwail rong! Kumwail me maskun kan, kumwail pehdpeseng oh tehk mwahu!

¹⁹Mie emen me maskun mehlel sang ei laduwo, oh salengepon sang nei meninkedero?

²⁰Israel, ke kilangehr soahng tohto, ahpw dahme ke sohte katapankihki? Mie salengomw mehn rong wasa, ahpw dahme ke sohte rongki?”

²¹KAUN-O, iei Koht emen me kin ketin kupwurohki komourpen aramas, iei me e kin kupwurki irail en wauneki sapwellime kosonned oh padahk kan.

²²Ahpw met sapwellime kan lohdier nan lokolok laud; re lekdekiongehr nan imweteng kan, re wie ekiek nan kalapwus kan. E kulsangehr ar dipwisou kan oh pirapalahr, sohte emen mie mehn doareirailla.

²³Mie emen rehmwail me pahn rong irair wet? Sang met kohla kumwail pahn rong kanahieng?

²⁴Ihs me pangala Israel rehn aramas lipirap pwuko? Pwe pein KAUN-O, me kitail wie dihpiong! Kitail sohte men kapwaiada kupwure ong kitail, de sohte men peikiong sapwellime padahk kan!

²⁵Ihme e kupwuredahki en kapehmkin kitail roson en sapwellime engieng, oh ketin kalokehkin kitail kalokolok en mahwen. Sapwellime engieng, rasehng kisiniei, ih me kalullada Israel pwon, kitail ahpw sohte dehdehki dahme wiewiawi; kitail sohte alehdi padahkpen irair wet.