Read Pohnpeian Aiseia 46 Bible Online

Aiseia 46 - Pohnpeian bible

Aiseia 46

¹“Iei met imwilahn koht likamw akan en Papilon! Mahso aramas akan kin kaudokiong Pel oh Nepo, ahpw met ahs akan kin weuwa ira, ira wialahr wisik toutou ehu ong mahn akan me pwangadahr.

²Dikedik en eni pwukat sohte kak pein doareirahla, ira wialahr dipwisou lohdi kei me wisiwisik kohla. Ei, iei imwilahn koht en Papilon kan!

³“Kumwail kadaudok en Seikop, kumwail rong ie, kumwail nei aramas koaros me luhwe. I kin apwahpwalih kumwail sang ni amwail ipwidi.

⁴Ngehi me amwail Koht, oh I pahn kin apwahpwalih kumwail lao kumwail likeilapala oh moangepwetala. Ngehi me wieikumwailda oh I pahn apwahpwalih kumwail; I pahn sewesei kumwail oh kapitkumwailla.”

⁵KAUN-O mahsanih, “Ihs me kumwail pahn karasahiong ie? Mie emen me duwehte ngehi?

⁶Aramas akan kin wakapeseng neirail pilihs kan oh wudekieisang kohl loale, oh kin tenekihda silper kan pohn mehn tenek kan. Irail kin pwainda sounsuk kohl pwe en en wiahda arail koht; re ahpw kin poaridi oh pwongih.

⁷Re ahpw kin rowehla, oh koasoanediong nan dewe, e ahpw kin mihmihte wasao, nennenewei, sohte kak mwekid. Ma emen pahn kapakapohng, e sohte kak sapeng, de kapitasang aramaso nan eh apwal.

⁸“Kumwail me dipan akan, kumwail tamataman wiepen nin limei.

⁹Kumwail tamanda dahme wiawiher mahso; kumwail kadehdehda me ngehite me Koht, oh sohte pil emen me duwehte ngehi.

¹⁰Sangete nin tapio I kasalehda dahme pahn wiawi mwuhr, I kohpada mahsie dahme pahn wiawi. I mahsanih me ei koasoandi kan uhdahn pahn pweida, pwe mehkoaros me I kupwurki uhdahn pahn pweida.

¹¹I malipeier ohl emen sang ni palimese, e pahn pihrdo marahra rasehng likoht men oh kapwaiada ei koasoandi kan koaros. Ngehi me mahmahsen; eri, e pahn pweida.

¹²“Kumwail aramas keptakai kan, kumwail rong ie, kumwail me kin lemeleme me amwail manaman en powehdi me dohsang kumwail.

¹³I pahn kamwadangahdo rahnen amwail powehdi- e uhdahn kerendohr mehlel. Ei lingan en powehdi sohte pahn pwand, I pahn doarehla Serusalem oh kawauwihala Israel wasao.”