Read Pohnpeian Aiseia 48 Bible Online

Aiseia 48 - Pohnpeian bible

Aiseia 48

¹Kumwail rong met, kumwail aramas en Israel kan, kumwail kan me kadaudok en Suda: Kumwail kin kahukihla ni mwaren KAUN-O, oh kosekose me kumwail kin kaudokiong Koht en Israel- ahpw amwail lokaia kan sohte mehlel.

²Oh kumwail kin pohnmwahsohki oh koasoia me kumwail iei towe mehlel en kahnimw sarawio, oh dene kumwail kin koapworopworki Koht en Israel, me mware iei KAUN-O, Wasa Lapalap.

³KAUN-O ketin mahsanihong Israel, “I kohpadahr mahsie dahme pahn wiawi; eri, I mwadangete kupwurehda pwe en pweida.

⁴I esehte me ke pahn wia wehi ehu me keptakai, me tepinwer kekeluwak rasehng mete oh tumwomwen rasehng prons.

⁵Ihme I kohpkidahr mahsie dahme pahn lelohng uhk, lohlohki mwekid kan mwohn ar pahn leledo, pwe ke en dehr kosekose me noumw dikedik en eni kan oh sansal likamw akan me kahredahr mepwukat eh pweida.

⁶“Mehkoaros me I kohpadahr pweidahr; ke uhdahn pahn dehdehki mwahu me ei kohkohp kan me pwung. Eri, met I pahn ndahng uhk soahng kapw akan me pahn kohdo, mwekid kan me I sohte kasalehda mahs.

⁷I ahpwtehn pahn kapwarehda mepwukat ahnsou wet; sohte mehkot me duwehte met me wiawiher mahs. Pwe ma I kasalehda mahs, ke pahn koasoia me dene ke eseier duwen mepwukat koaros.

⁸I ese me sohte me kak likihiuk, ni omw wia aramas kahngohdi men ahnsou koaros. Ih kahrepen omw sohte mwahn rongki duwen met, oh sohte rohng ehu lelohng uhk.

⁹“Pwe aramas akan en kapinga mwarei, me kahrehda ei kolokol ei engieng; I pahn kolokol oh sohte kauweiukala.

¹⁰I sohnguhkehr nan kisiniei en lokolok, rasehng silper eh kin kamwakelda nan kisiniei. Ahpw I diaradahr me sohte katepomw.

¹¹Dahme I kin wia, kin wiawihong ni pein kawaupei- I sohte pahn mweidohng mwarei en sohla wauwi de mweidohng emen en iang ahneki lingan me uhdahn ahi oh ahi kelehpw.”

¹²KAUN-O ketin mahsanih, “Rong, kowe Israel, aramas akan me I malipedohr! Ngehi me Koht, me tapi oh imwi, Koht metehmen!

¹³Nin limei kat me wiadahr poahsoan kan en sampah oh sohngedi pahnlahng. Ni ei kin malipe sampah oh lahng, re ahpw kin mwadangete patohdo oh uh mwohi.

¹⁴“Kumwail koaros, kumwail pokonpene oh rong! Sohte koht emen me kak kohpada me ohl me I piladahro pahn mahweniong Papilon; e pahn kapwaiada dahme I kupwurki en wia.

¹⁵Ngehi me mahseniong oh malipehdo; Ngehi me kahluwa oh kupwurehda pwe en pweida.

¹⁶“Eri, kumwail keido oh rong dahme I pahn mahsanih. Sang nin tapio I kin mahsen ni sansal oh kin kupwurehda pwe ei mahsen kan en kin pweida.” (Eri, met KAUN-O, Wasa Lapalahpie, ketikihiongieier sapwellime manaman oh ketin kadariedohr.)

¹⁷Koht sarawien Israel, KAUN-O me omw sounkomour, mahsanih: “Ngehi me KAUN-O omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.

¹⁸“Ma ke rongete ei kosonned akan! Eri, kupwuramwahu ahpw pahn pwilipwiliwei rehmw rasehng piletik pwoat me sohte kin madada. Powehdi pahn lelohng uhk, rasehng iloak kan me kin pwungupwungdohng ni oaroahr.

¹⁹Kadaudokomw kan pahn tohto rasehng pihk en ni oaroahr, oh I pahn tetehk mwahu pwe re en dehr mwomwla.”

²⁰Eri, kumwail kohkohwei sang nan Papilon, kumwail saledekla! Kumwail weriwerki rohng kaperen wet; kumwail lohkiseli wasa koaros: “KAUN-O ketin doarelahr sapwellime ladu Israel!”

²¹Ni ahnsou me KAUN-O ketin kahluwa sapwellime aramas akan kotehla wasa karakar ehu, nan sapwtehn madekeng, re sohte men nimpilda. E ketin kupwurehda pwe pihl en kusieisang nan paip ehu pwe re en nim; e ketin pwalangpeseng paipo, oh pihl ahpw kusieisang loale.

²²KAUN-O ketin mahsanih, “Sohte poadoarepen me dipan akan.”