Read Pohnpeian Aiseia 49 Bible Online

Aiseia 49 - Pohnpeian bible

Aiseia 49

¹Kumwail tohn wehi doh kan, kumwail rong ie, kumwail aramas me kin kousoan wasa doh kan! Mwohn ei ipwidi, KAUN-O ketin piliedahr, oh ketin kilelehdi pwe I en wiahla sapwellime ladu.

²E ketin kakengihala ei koasoi kan rasehng kedlahs keng; e ketin kasilehkin ie pein nin lime kan. E ketin wiahkiniehla arep pwoat, me imwkeng oh kin kaunopadahr ong doadoahk.

³E mahsanihong ie, “Israel, kowe me ei ladu; pwehki kowe me aramas akan pahn kin kapingahkin ie.”

⁴I ahpw patohwan, “I doadoahkehr, ahpw ia uwen eh sohte katepe! I wiahda uwen me I kak, ahpw sohte mwahn lipwen ei doadoahk.” Ahpw I kak koapworopworki KAUN-O pwe en ketin uhpalikin ie; e pahn ketin katingih ei doadoahk.

⁵Mwohn ei ipwidi, KAUN-O, ketin piliedahr; e ketin wiahkin ie sapwellime ladu pwe I en kapwuredohng reh sapwellime aramas akan, mehn Israel kan me kin kousoanseli wasa kan nin sampah. KAUN-O ketin kawauwihielahr mwohn silangi; iei ih me pwarer en ei kehlail.

⁶KAUN-O ketin mahsanihong ie, “I pahn kihong uhk, ei ladu, doadoahk kesempwal me lapasang met. Kaidehn ke pahn onehdahte sapahl lingan en aramas en Israel kan me luhwehdi, ahpw I pahn pil wiahkinuhkala mehn kamarainpen wehi kan- pwe tohn sampah koaros en kak mourla.”

⁷Koht sarawien Israel oh sounkomour ketin mahsanihong ih me aramas kin mwamwahliki, me wehi kan kin kailongki oh me kin wia ladun kaun akan: “Nanmwarki kan lao pahn mahsanih omw saledeklahr, re pahn ketida pwe re en kasalehda ar waunekin uhk; soupeidi kan pahn pil mahsanih duwen kowe, re ahpw pahn pil poaridi pwe re en waunekin uhk.” 1 Eri, met pahn pweida, pwehki KAUN-O ketin pilada sapwellime ladu; Koht sarawien Israel kin ketin dadaurete sapwellime inou kan.

⁸KAUN-O ketin mahsanihong sapwellime aramas akan, “Ni ahnsoun komour eh pahn leledo, I pahn sewesei kumwail, oh I pahn sapeng amwail kapakap en peksawas. I pahn apwahpwalih oh sinsilei kumwail, oh pwehki kumwail I pahn wiahda inou ehu ong aramas koaros. I pahn mweidohng pwe kumwail en pwurehng soandihla nan sapwamwail me ahnsou wet mwomwlahr.

⁹I pahn mahsanihong me sensel kan, ‘Kumwail saledekla!” oh ong irail kan me mihmi nan rotorot, ‘Kumwail kodohng nan marain!’ Re pahn rasehng pelin sihpw kei me kin mwengemwengeseli pohn dohl kan;

¹⁰re solahr pahn men mwengehda de men nimpilda. Ketipin oh karakar en nan sapwtehn solahr pahn kauwe irail, pwe re pahn kin idawehnseli ih me kin loalloale irail. E pahn kin kahreiraillahng ni pwarer en pihl kan.

¹¹“I pahn wiahda ahl lap pwoat me pahn kotehla nahna kan, oh kaunopada ahl ong nei aramas akan pwe re en keid ie.

¹²Nei aramas akan ahpw pahn kohdo sang sahpw doh kan, sang paliepeng oh palikapi, oh sang Aswan ni palieir.”

¹³Kumwail nanleng kan, kumwail koul! Sampah en ngisingiski eh peren! Nahna kan en pil iang koulki koulen kaping! KAUN-O pahn ketin koaloalamwahwihala sapwellime aramas akan; e pahn ketin kupwurkalahngan ong sapwellime kan me wie lokolok.

¹⁴Ahpw tohn Serusalem kan nda, “KAUN-O ketin keseikitalahr. E ketin likidmelieikitalahr.”

¹⁵KAUN-O eri sapeng, mahsanih, “Kakete lih emen en manokehla uhdahn nah seri pwelel, oh sohte poakepoake wahnedio? Mehnda ma nohno men kak manokehla nah seri, ahpw ngehi, I sohte kak manokeiukala.

¹⁶Serusalem, I sohte kak manokeiukala! I ntingihdier mwaromw nan pehi kat.

¹⁷“Irail ko me pahn oneiukada sapahl, re pahn leledo ni ahnsou mwadang, oh irail kan me kamwomwuhkalahr, re pahn mweselda.

¹⁸Sarada oh kilang dahme wiewiawi! Noumw aramas akan pokonpenehr-re samwodohngehr rehmw! Nin duwen ngehi, Koht ieias, ke pahn pohnmwahsohki noumw aramas akan, duwehte lih kamwohd emen eh kin pohnmwahsohki eh kapwat akan.

¹⁹“Sapwomwet ohlahr oh tehnlahr- ahpw met e pahn koaitlahr, pwehki aramas akan me kohkodohn kousoanla ie. Oh irail ko me kamwomwuhkalahr, re pahn lekdekla dohlahsang uhk.

²⁰Ehu rahn kohkohdo, noumw aramas akan me ipwidier ni ar kalipilipala pahn ndaiong uhk, ‘Sahpwet me nohn tikitikiong kitail- kitail uhdahn anahne kalaudlahn sahpw pwe kitail en kousoan ie!’

²¹Kowe eri pahn mengimengloalki, ‘Ihs me kaipwidiong ie seri pwukat? I sohla neitik, I depwenlahr. I kalipilipalahr oh pekeuslahr- eri, ihs me apwalihada seri pwukat? I kin kalakalapwuk, sohte me kin tehk ie- eri, seri pwukat kohsang ia?’ ”

²²KAUN-O, Wasa Lapalahpie, ketin mahsanihong sapwellime aramas akan: “I pahn kapahwei limeiet pohn wehi kan, irail ahpw pahn kapwuredohng uhk noumw seri kan.

²³Nanmwarki kan pahn kin apwalihiuk duwehte pahpa men; lih nanmwarki kan pahn kin katungoaleiuk duwehte nohno men. Re pahn kin poaridi mwohmw oh waunekin uhk; re pahn kin kasalehda ar waunekin uhk ni aktikitik. Ke ahpw pahn dehdehkihla me ngehi me KAUN-O; oh irail kan me kin awiawih ei sawas, sohte pahn nsensuwedla.”

²⁴Ke kak adihasang sounpei men dipwisou me e kalowehdi nan mahwen? Ke kak kapitala kalapwus men sang rehn aramas lemei men?

²⁵KAUN-O ketin sapeng, mahsanih, “Ih me pahn wiawi en met. Me kalapwus kan pahn pehdsang rehn sounpei kan, oh dipwisou lohdi nan mahwen kan pahn pehdasang rehn aramas lemei meno. I pahn uhwong oh pelianda irail kan me pahn uhwong uhk, oh I pahn kapitala noumw seri kan.

²⁶I pahn mweidohng omw imwintihti kan en pein kemeirailpene; re pahn sahlielkihla ar lingeringer oh kamaramas. Aramas koaros ahpw pahn dehdehkihla me iei ngehi, KAUN-O, me kin komouruhkala oh kasaledekihiukala. Re pahn esehla me iei ngehi, Koht me manaman en Israel.”