Read Pohnpeian Aiseia 61 Bible Online

Aiseia 61 - Pohnpeian bible

Aiseia 61

¹Ngenen KAUN-O ketier rehi. E ketin keieiedier pwe I en lohkiong me semwehmwe kan rongamwahu, I en kansenamwahwihala me nan kapehd toutoulahr akan, I en lohkiong me sensel kan ar saledek oh saledek ong irail kan me mihmi nan imweteng.

²E ketin poaroneiehdo pwe I en lohkihda duwen ahnsou me KAUN-O pahn ketin komourala sapwelime aramas akan, oh ketin kalowehdi ar imwintihti kan. E ketin poaroneiehdo pwe I en koaloalamwahwihala koaros me kin pahtou kan.

³I en kihong irail kan me kin nsensuwed nan Saion peren oh nsenamwahu, ahpw kaidehn pahtou. Re en pereperen kokoulki koulen kaping, ahpw kaidehn koulen kedepwidepw. Re pahn rasehng tuhke kan me pein KAUN-O ketin padokedier. Irail koaros pahn kin wia dahme pwung, oh kapikapingahki Koht wiepen nin lime kan.

⁴Re pahn onehda sapahl kahnimw kan me ohlahr mahsie.

⁵Mehn liki kan pahn papah kumwail, nei aramas akan. Re pahn apwalih noumwail pelinmen kan, oh wiahda mwetuwel nan sapwamwail oh apwalih amwail mwetin wain kan.

⁶A kumwail, kumwail pahn wiahla samworoun KAUN-O, ladun atail Koht. Kumwail pahn nsenamwahukihla kepwe kesempwal en wehin liki kan, oh pohnmwahsohki me dene uhdahn amwail.

⁷Amwail namenek oh saroh imwiseklahr. Kumwail pahn kousoanla nan uhdakamwail, oh amwail kepwe kesempwal kan pahn tohtohla pahn pak riau. Amwail peren pahn kin poatopoat kohkohlahte.

⁸KAUN-O ketin mahsanih, “I kin poakohng dahme pwung, oh kin kalahdeki tiahk en kahpwalihala meteikan oh tiahk suwed. I pahn katingih ni loalopwoat nei aramas akan, oh wiahiong irail inou poatopoat ehu.

⁹Re pahn ndandla nanpwungen wehin liki kan; oh koaros me pahn kilang irail re pahn ese me irail nei aramas akan me I kin loalloale oh kupwuramwahwih.”

¹⁰Serusalem kin ngisingiski oh pereperenki soahng kan me KAUN-O ketin wiahiongehr. E rasehng lih kamwohd emen me kapwatkidahr eh likoun kapwopwoud. Koht ketin kalinganahkilahr Serusalem lingan en komour oh roson en powehdi.

¹¹KAUN-O, Wasa Lapalap, pahn ketin komourala sapwellime aramas akan, duwehte sahpw me kin kawosehda oh kakairada werentuhke kan, oh wehi koaros pahn kapikapinga ih.