Read Pohnpeian Lipai 6 Bible Online

Lipai 6 - Pohnpeian bible

Lipai 6

¹KAUN-O ketikihong Moses koasoandi pwukat.

²Aramas emen pahn patohwanda eh meirong ma e wiahda dihp ong KAUN-O ni eh kahng kapwurehiong mehkot me rie mehn Israel men likihong, de ni eh pirapahsang de pitihasang mehkot,

³de lokaia likamwki mehkot me pwupwula ni eh kahukihla me e sohte diarada.

⁴Ma aramas emen pahn dipikihda ehu dihp pwukat, e pahn kapwungala dipwisowo pwehki eh wiahda likamw. Ni rahn me dipeo pahn dehdedahr, e pahn kapwurehiong dipwisou ko koaros rehn rie mehn Israelo oh pil kapatahiong persent rieisek.

⁵Ma aramas emen pahn dipikihda ehu dihp pwukat, e pahn kapwungala dipwisowo pwehki eh wiahda likamw. Ni rahn me dipeo pahn dehdedahr, e pahn kapwurehiong dipwisou ko koaros rehn rie mehn Israelo oh pil kapatahiong persent rieisek.

⁶E ahpw pahn wadohng samworo sihpw wol de kuht wol men me sohte kisin samin kis reh pwehn wia eh meirong en kapwungala ong KAUN-O. Pweinen mahno pahn mihmi ni uwen me koasoandier.

⁷Samworo ahpw pahn meirongkihla pwehn wia meirong en dipen aramaso, dipeo ahpw pahn lapwada.

⁸KAUN-O ketin mahsanihong Moses,

⁹en padahkihong Aaron oh nah pwutak ko koasoandi pwukat duwen meirong isihs kan. Meirong isihs pahn mihmihte pohn pei sarawio erein pwohng ehu pwon, oh kisineio pahn lullulte.

¹⁰Eri samworo me likawih likou linen reirei oh rausis linen pahn kihsang pehs ko pohn pei sarawio oh kihdiong ni pengepengen pei sarawio.

¹¹Mwuri e pahn wilian eh likou ko oh ale pehs ko walahng likin kahnimpwalo wasa kis me mwakelekel ong kaudok.

¹²Kisiniei pohn pei sarawio pahn lullulte, sohte pahn koakunla. Nimenseng koaros samworo pahn kin kihong tuwi oh koasoanehdi meirong isihso powe, oh isikala wih en meirong en kaminimino.

¹³Kisinieio pahn kin lullulte ahnsou koaros pohn pei sarawio, oh sohte pahn koakunla.

¹⁴Iet duwen koasoandi kan me pid meirong en wahnsahpw. Emen samworo me kadaudok en Aaron pahn patohwandahng KAUN-O meirong en wahnsahpw mwohn pei sarawio.

¹⁵E ahpw pahn ale ekis oaroahr en pilawao oh leh, iangahki warpwohmwahu me mi powe, e ahpw pahn isikala pohn pei sarawio nin duwen kilel ehu me koaros meirongalahr ong KAUN-O.

¹⁶Samworo pahn tungoale luhwen pilawao. Re pahn wiahkihda pilawa umw me sohte doal ihs oh tungoale nan wasa sarawi ehu, nan kelen Impwal me KAUN-O kin ketiket loale. KAUN-O ketikihongehr samworo ko meirong wet pwe en wia kisehn ar meirong en konot. Meirong wet me inenen sarawi, duwehte meirong en dihp oh meirong en kapwungala.

¹⁷Samworo pahn tungoale luhwen pilawao. Re pahn wiahkihda pilawa umw me sohte doal ihs oh tungoale nan wasa sarawi ehu, nan kelen Impwal me KAUN-O kin ketiket loale. KAUN-O ketikihongehr samworo ko meirong wet pwe en wia kisehn ar meirong en konot. Meirong wet me inenen sarawi, duwehte meirong en dihp oh meirong en kapwungala.

¹⁸Erein dih koaros kohkohlahte kadaudok en Aaron ohl koaros kak tungoale pilawa wet pwe pweisarail sang ni mwenge me meirongalahr ong KAUN-O. Mehmen sohte lipilipil me pahn sair meirong en konot ehu pahn ohla pwehki meirongo me sarawi.

¹⁹KAUN-O ketikihong Moses koasoandi pwukat

²⁰me pid kesepwildahn emen samworo me kadaudok en Aaron. Ni rahn me e pahn sepwilda, e pahn meirongkihong KAUN-O paun en pilawa riau (duwehte mehn meirong en wahnsahpw en rahn koaros), elep nimenseng oh elep nin soutik.

²¹Pilawa wet pahn doal leh oh kuk pohn mehn prain. Mwuri e ahpw pahn pilitikihdi oh meirongki duwehte meirong en wahnsahpw me pwowe kin kaparanda kupwur en KAUN-O.

²²Kadaudok en Aaron koaros me pahn wia doadoahk en Samworo Lapalap pahn wia meirong wet erein dih koaros kohkohlahte. Re pahn isikala koaruhsie nin duwen meirong ehu ong KAUN-O.

²³Sohte emen pahn tungoale mehkot sang ni meirong en wahnsahpw me samworo emen pahn meirongki, koaruhsie pahn isihsla.

²⁴KAUN-O ketin mahsanihong Moses,

²⁵en padahkihong Aaron oh nah pwutak ko koasoandi pwukat me pid meirong en dihp. Mahn me pahn wia mehn meirong en dihp, pahn kamakamala ni paliepeng en pei sarawio, wasa me mahn en meirong isihs kin kamala ie. Meirong wet me inenen sarawi.

²⁶Samworo me meirongkihla mahno pahn tungoale uduke nan wasa sarawi ehu, nan kelen Impwalen KAUN-O.

²⁷Mehmen de mehkot me pahn sair uduk en mahno, pahn ohla pwehki mahno me sarawi. Ma ntahn mahno kohieng ni likou ehu, likowo pahn lopwolopw nan wasa sarawi ehu.

²⁸Ma re pwoailih uduko nan einpwoat me wiawihkida pwehl, re pahn kauwehla einpwoato. Ma re pwoailih uduko nan einpwoat mete, re pahn irisada oh udenki pihl.

²⁹Ohl koaros en peneinei en samworo kak iang tungoale mehn meirong wet; meirong wet me inenen sarawi.

³⁰Ahpw ma re pahn patohwanla ntahn mahno nan Impwalo pwe re en doadoahngki ni sarawien meirong en tomwki dihp, sohte me pahn tungoale uduk en mahno; re pahn isikala.