Read Pohnpeian Seremaia 12 Bible Online

Seremaia 12 - Pohnpeian bible

Seremaia 12

¹Maing KAUN, ma I pahn akamaikihong komwi ei pwuhng, komwi pahn ketin kadehdehda omwi pwung. Ahpw iet pwe I pahn kalelapak rehmwi duwen ire kan me pid pwuhng. Dahme aramas suwed kan kin kepwehpwehki? Dahme aramas mwersuwed kan kin pweikihda?

²Komwi ketin padokiraildi, re ahpw kin kadarala kalowahr; re kin keirda oh wa. Re kin koasoiakin komwi mehkot mwahu ahnsou koaros, ahpw re sohte katapankin komwi.

³Ahpw komwi ketin mwahngih ie, Maing KAUN; komwi mwahngih dahme I kin wia oh duwen ei patohwan poakohng komwi. Komw ketin wuradekihla aramas suwed pwukat rasehng sihpw me pahn kamakamala; komwi ketin sinsile irail lao lel ahnsoun ar kamakamala.

⁴Ia erein sahpwet eh pahn wie mademadekeng, oh dihpw kan nan mwaht koaros mengimengdi? Mahn kerep oh menpihr kan mehmehla pwehki suwed en neitail aramas akan, aramas akan me kin nda, ‘Koht sohte ketin mwahngih dahme kitail wiewia.’ ”

⁵KAUN-O ketin mahsanih, “Seremaia, ma ke pwangadahr weirentang ong aramas akan, eri, ia duwen omw pahn kak weirentang ong oahs akan? Ma ke pil sohte kak kesihnenda nan sahpw patapat, ia duwen omw pahn kak kesihnenda nanwel limwahn Jordan?

⁶Pil riomw kan, kisehn omw peneinei, panguhkalahr; re iang uhwong uhk. Ke dehr liki irail, mehnda ma re lokaia kadek.”

⁷KAUN-O ketin mahsanih, “I keselahr Israel; I soikalahr wehi me I piladahro. I ketikilahr aramas ako me I kin loalloale pahn manaman en ar imwintihti kan.

⁸Nei aramas pilipil kan uhwongieier; rasehng laion kan nanwel me wie ngiringirdohng ie, ihme I kalahdekin irail.

⁹Nei aramas pilipil kan rasehng menpihr men me likoht kan kin pihrpenehng sang wasa koaros. Likwerih mahn lawalo kan en kohdo oh iang kamadipwo!

¹⁰Kaunen liki tohto kamwomwalahr ei mwetin waino; re tiakpesengier ei mwaht kan; re wekidehngehr sapweio sapwtehn ehu.

¹¹Re wiahkilahr sapwtehn ehu; e wonohnehr wialahr sapwtehn mwohn silangi. Sahpwo pwon wialahr sapwtehn, oh sohte emen me katapanki.

¹²Aramas akan kodohr sang wasa ile kan en sapwtehno, pwe re en kulihasang dipwisou kan. I kupwuredahr pwe mahwen en kamwomwala sahpwo pwon; sohte emen kak ahneki mour meleilei.

¹³Nei aramas akan kamwere werentuhke, re ahpw dolung dihpw; re doadoahk laud, ahpw sohte wahn ar doadoahk. Pwehki ei engieng kowahlap, kahrehda arail wahnsahpw akan ohlahr.”

¹⁴KAUN-O ketin mahsanih, “Mie mehkot me I men mahsanih duwen mehn mpen Israel kan me kauwelahr sahpw me I ketikihongehr nei aramas en Israel kan. I pahn ketikihsang aramas suwed pwuko nan sapwarail kan rasehng tuhke me usuhsda, oh I pahn kapitala Suda sang pahn ar manaman.

¹⁵Ahpw mwurin ei pahn ketikiniraillahsang, I ahpw pahn mahkohng irail; I pahn kapwurehdo ehuehu wehi nan uhdake.

¹⁶Ma re pahn perenki alasang duwen nei aramas akan ar kin kaudokiong ie oh kahukihla, ‘Nin duwen Koht ieias’-nin duwen me re padahkihongehr nei aramas akan en kin kahukihla mwaren Paal mahs-eri, re pahn wiahla kisehn nei aramas akan oh pahn paiamwahula.

¹⁷Ahpw ma wehi ehu sohte pahn kapwaiada, eri, I pahn usada oh kamwomwala douluhl. Ngehi, KAUN-O, me mahmahsen.”