Read Pohnpeian Seremaia 18 Bible Online

Seremaia 18 - Pohnpeian bible

Seremaia 18

¹KAUN-O ketin mahsanihong ie,

²“Kohdiwei ni imwen sounwia dahlo, I ahpw pahn kihong uhk ei mahsen.”

³Ngehi eri kohdihla wasao oh kilangada sounwia dahl emen eh wie doadoahk nan eh wasahn doadoahk.

⁴Ahnsou koaros me nesen pwehlo, me e wiewiahkihda dahl de sah kan, kin sapwungala, e kin ale pwehlo oh wiahkihda ehu soahng tohrohr.

⁵KAUN-O eri mahsanihong ie,

⁶“Ia duwe, I sohte kak wiahiong kumwail mehn Israel, soahng me sounwia dahlo kin wiahiong pwehlo? Kumwail kin mihmi nin limei kat duwehte pwehl nan pehn sounwia dahlo.

⁷Ma ehu ahnsou I pahn nda me I pahn usada, de kauwehla, de kamwomwala ehu wehi de wehin nanmwarki,

⁸a wehio ahpw pahn weksang eh suwed, eri, I pahn pil wekidala ei lamalam duwen me I ndao.

⁹A ma I pil nda me I pahn padokedi de kauwada ehu wehi de wehin nanmwarki,

¹⁰a wehio ahpw pahn wiahda me suwed, eri, I pahn pil wekidala ei lamalam duwen me I ndao.

¹¹Eri met, ke ahpw padahkihong mehn Suda oh Serusalem kan duwen ei koasoanehdi me I pahn uhwong irail oh duwen ei onohnop en kaloke irail. Padahkihong irail re en tokedihsang ar mour suwed kan-wekidala ar tiahk kan oh soahng suwed kan me re kin wiewia.

¹²Ahpw re pahn sapengkin uhk, nda, ‘Soh! Dah katepeiong kiht? Kiht koaros pahn wiewia nsenat; se pahn kin keptakai oh suwed, ma se mwahuki.’ ”

¹³KAUN-O ketin mahsanih, “Kumwail idek rehn wehi kan koaros ma mie soahng wet me wiawiher mahs. Mehn Israel kan wiadahr sapwung lapalap ehu!

¹⁴Pala sinoh kak neksang pohn kumwen nahna kan en Lepanon? Pala piletik kan me kin kalamwurih Lepanon kak madada?

¹⁵Ahpw nei aramas akan manokeielahr; re kin isikadahng warpwohmwahu kan ong dikedik en eni kan. Re wasawasasseli nan ahl me re en keid ie, re solahr keid nan ahl en mahso; re ahpw kin kekeid nan ahl akan me sohte kilel mie ie.

¹⁶Re wiahkilahr sahpwet sahpw kelemw ehu, me pahn wiamwahllahr kohkohlahte. Koaros me kin keid limwah pahn pwuriamweikihla dahme re kilikilang, re ahpw pahn itingkihla moangarail kan ar pwuriamwei.

¹⁷I ahpw pahn kamwarakpeseng nei aramas akan mwohn arail imwintihti kan, rasehng pwelpar me ipipirengkiseli kisinieng en palimese. I pahn sohpeisang irail, I sohte pahn sewese irail nan ar apwal.”

¹⁸Aramas ako eri ndapene nanpwungarail, “Kitail kesepwekehsang rehtail Seremaia. E pahn mie samworo ahnsou koaros me pahn kin padahki kitail, aramas loalokong me pahn kaweid kitail, oh soukohp kan me pahn lohkiong kitail mahsen en Koht. Eri, kitail kedipahda Seremaia oh dehr rong dahme e kin kapakapahrengki.”

¹⁹Ngehi eri kapakap, patohwan, “Maing KAUN, komwi ketin karonge ie, oh ketin mwahngih duwen ei imwintihti kan ar peliankin ie ar koasoi.

²⁰Ia duwe, suwed iei pweinen wiewia mwahu? Re weiradahr pwoahr ehu pwe I en pwupwudiong loale. Komwi ketin tamanda duwen ei patohdo pahn kupwuromwi pwehki irail, oh peki ni ngidingid pwe komwi en dehr ketin kaloke irail nan omwi engieng.

²¹Eri met, Maing KAUN, komw ketin mweidala pwe neirail seri kan en mehkihla duhpek; re en mehkihla mahwen. Lih akan en depwenla oh liohdihla. Ohl akan en mehkihla soumwahu, oh mwahnakapw akan en kamakamala nan mahwen.

²²Komw ketin kadarodohng irail ehu pwihn suweden, pwe re en wehdpeseng imwarail kan oh kulihasang ar dipwisou kan; re en masepwehkada werwer! Pwe re weiradahng ie pwoahr ehu I en pwupwudiong loale, oh wiadahr nsar kei pwe en nsareiehdi.

²³Ahpw, Maing KAUN, komw ketin mwahngih ar koasoakoasone re en kemeiehla. Komw dehr ketin meliehla ar wiewia suwed kan de lapwahsang diparail kan. Komw ketin kasaroweiraildi oh kasohreirailla. Komw ketin wiahiong irail mepwukat ni omwi engieng.”