Read Pohnpeian Seremaia 22 Bible Online

Seremaia 22 - Pohnpeian bible

Seremaia 22

¹KAUN-O ketin mahsanihong ie I en patohla ni tehnpesen nanmwarkien Suda, me kisehn kadaudok en Depit, oh patohwanohng nanmwarkio, sapwellime lapalap ako, oh mehn Serusalem kan, re en rong dahme KAUN-O ketin mahsaniher:

²KAUN-O ketin mahsanihong ie I en patohla ni tehnpesen nanmwarkien Suda, me kisehn kadaudok en Depit, oh patohwanohng nanmwarkio, sapwellime lapalap ako, oh mehn Serusalem kan, re en rong dahme KAUN-O ketin mahsaniher:

³“Ngehi, KAUN-O, I koasoanediong kumwail en kin wiahda dahme mwahu oh pwung. Kumwail apwalih aramas me meteikan kin pitipitih. Kumwail dehr wiakauwe de kapwalihala mehn liki kan, me sepwoupwou kan, de liohdi kan; oh dehr kemehla aramas me soh dipe wasa sarawi wet.

⁴Ma kumwail pahn kapwaiada ei koasoandi wet, eri, kadaudok en Depit kan pahn usehlahte wiewia nanmwarki. Oh irail, iangahki lapalap akan oh sapwellimarail aramas akan, pahn usehlahte pedolong nan ewen kehl kan en tehnpas wet, dake werennansapw oh oahs akan.

⁵Ahpw ma kumwail sohte pahn kapwaiada ei koasoandi wet, eri, I kahukihla me tehnpas wet pahn pwupwudi ohla. Ngehi, KAUN-O, me mahmahsen.

⁶“Ong ie, tehnpesen nanmwarkien Suda inenen lingan duwehte sapwen Kilead, oh duwehte nahna kan en Lepanon; ahpw I pahn wiahkihla wasa tehn, wasa me sohte aramas kin kousoan ie.

⁷I pahn kadarowei aramas ekei me pahn kauwehla tehnpaso. Re pahn wa kohwei nair sile kan, pelehdi uhr Sidar kaselel kan loale, oh keselahng nan kisiniei.

⁸“Mwuhr, mehn liki tohto pahn keid wasaht oh wiapene peidek wet, dahme ngehi, KAUN-O, ketin wiahkidahr soahng wet ong kahnimw lapalap wet.

⁹Re ahpw pahn sapengki, pwehki amwail kauwehla amwail inou ong ie, amwail Koht, oh kaudokiong oh papah koht teikan.”

¹⁰Mehn Suda kan, kumwail dehr sengisengki Nanmwarki Sosaia; kumwail dehr mwahieiki eh pwoula. Ahpw kumwail sengisengki kowahlap sapwellime pwutak Soahas; me samwalahr solahr pahn pwurodo, solahr pahn pwurehng kilang sahpw me e ipwidi ie.

¹¹KAUN-O ketin mahsanih duwen Soahas, nein Sosaia pwutak me wiliandi eh pahpa wiahla nanmwarkien Suda. “E samwalahr, solahr pahn pwurodo wasaht.

¹²E pahn sipalla nan wehi me e wisiklahng ie, oh e sohte pahn pwurehng mahsanih sahpwet.”

¹³Meid suwediong aramas me kin kauwada imwe pohn pwuhng sapahrek, oh kin katelapahkihla mwersuwed; me kin koadoadoahkih mehn mpe kan oh sohte kihong pweinen ar doadoahk.

¹⁴Meid suwediong aramas me kin nda, “I pahn kauwada imwei ehu lapalahn ihmwen me pere laud kei pahn mi nan poasoake powe.” Ih eri kihong wenihmwtok kei ni imweo, mesendidkihda tuhke sidar, oh litopwehki litopw weitahta.

¹⁵Ia duwe, komw kupwukupwure me komwi pahn wiahla nanmwarki mwahu men ma komw kaukihda tehnpasomwi tuhke sidar, me lingansang tehnpesen meteikan? Semomwio sapwellimaniki ieias kaselel. E kin pwung oh inen ahnsou koaros, oh e kin pweida ni mehkoaros me e kin wia.

¹⁶E kin ketikihong me semwehmwe kan pwuhng pahrek, oh mehkoaros kin pweida reh. Met iei duwen wehwehki KAUN-O.

¹⁷Ahpw komwi kin rapahkihte kamwahupomwi; komwi kemehla me soh dipe kan oh kapwalihala kowahlap sapwellimomwi aramas akan. KAUN-O, me mahmahsen.

¹⁸Eri, KAUN-O ahpw mahsanih duwen Sehoiakim, nein Sosaia, nanmwarkien Suda, “Sohte me pahn mwahieiki eh pwoula de nda, ‘I ahpw poakehla, I ahpw poakehla, kompoakepahio!’ Sohte me pahn sengisengki de palapalakahski, ‘Ei kaun, ei nanmwarki!’

¹⁹Eh seridi pahn duwehte seridi en ahs emen me pahn ruwahdekieila oh lekdekla likin ewen kelen Serusalem.”

²⁰Kumwail mehn Serusalem kan, kumwail kohla Lepanon oh weriwer, kumwail kohla nan sapwen Pasan oh likwer; kumwail likwersang nin nahna kan en Mohap, pwehki kompoakepahmwail kan koaros lohdier.

²¹KAUN-O mahseniong kumwail ni ahnsou me kumwail paiamwahwo, kumwail ahpw soikala, sohte men rong. Ihme kumwail kin wiewia erein amwail mour; kumwail sohte mwahn kin peikiong KAUN-O.

²²Kisinieng pahn ipirala amwail kaun akan, kompoakepahmwail kan pahn wisiksang nin duwen me selidi kei nan mahwen, amwail kahnimwo pahn sarohdi oh namenekla pwehki suwed kan me kumwail wiadahr.

²³Kumwail me kin komkommoal ni meleilei nanpwungen tuhke sidar kan me wisikdohsang Lepanon; ahpw ia uwen amwail pahn tihwohla ahnsou me medek pahn lel kumwail, medek me pahn rasehng medek en neitik.

²⁴KAUN-O ketin mahsanihong Nanmwarki Sehoiakin, sapwellimen Sehoiakim pwutak, nanmwarkien Suda. Nin duwen ngehi, Koht ieias, mehnda ma komwi me nei rihng en palimaun, ahpw I pahn keseikomwilahng

²⁵rehn aramas akan me komw kin masak, aramas akan me men kemeikomwihla. I pahn ketikinkomwilahng rehn Nepukadnesar, nanmwarkien Papilonia, oh sapwellime sounpei kan.

²⁶I pahn kalipeikomwihla oh omwi nohno. Kumwa pahn ketilahng nan wehi ehu me kumwa sohte ipwidi ie, oh kumwa koaros pahn sipalla wasao.

²⁷Kumwail pahn loalleidkihda sahpwet, ahpw kumwa sohte pahn sapahldo ie.”

²⁸I ahpw patohwan, “Ia duwe, Nanmwarki Sehoiakin wialahr sah ohla ehu me lekdeklahr oh solahr me anahne? Ih kahrepen ih oh sapwellime seri kan kalipilipkilahr nan sahpw ehu me sohte emen kin rong duwe?”

²⁹Oh sahpw, sahpw, sahpw! Rong dahme KAUN-O ketin mahsanih:

³⁰“Ohl menet milahr pahn keria ehu oh solahr pahn neitik seri, e sohte pahn pweida nan eh mour. Sohte pahn kadaudoke me pahn kaunda Suda nin duwen wiliepen Depit. Ngehi, KAUN-O, me mahmahsen.”